Aston Vila i Oli Votkins se ne zaustavljaju
Aston Vila danas na domaćem terenu u 31. kolu Premijer lige savladala Njukasl 3:0
Fudbaleri Aston Vile nastavljaju sa izvanrednim igrama od dolaska Unaija Emerija.
Tim iz Birmingema je danas u 31. kolu Premijer lige na domaćem terenu savladao Njukasl 3:0 i došao na šestu poziciju sa šest bodova manje, ali i utakmicom više od današnjeg rivala koji je na trećem mjestu.
"Vilenjaci" igraju odlično, na osam mečeva ne znaju za poraz u Premijer ligi, a danas su upisali petu pobjedu zaredom u ovom takmičenju. Posljednji poraz Vila je pretrpjela 18. februara od Arsenala kada je bilo 4:2.
Sa druge strane Njukasl, koji ima najbolju odbranu u ligi sa 24 primljena pogotka danas je prekinuo niz od pet pobjeda zaredom u Premijer ligi.
Na "Vila parku" je blistao Oli Votkins koji je postigao dva pogotka, a imao je i asistenciju kod vodećeg gola Ramzija u 11. minutu.
Prvi gol Votkins je postigao u 64, a onda je u 83. minutu postavio konačan rezultatat.
Votkins igra u sjajnoj formi i na 30 mečeva u Premijer ligi je postigao 15 pogodaka.
( S. Nj. )