Stara garda LSCG pozvala da se glasa za SDP
"Iskoristimo ovu jedinstvenu priliku i svojim glasavima oduzmimo poslanički mandat onima protiv kojih se borimo cijeli život"
Stara garda LSCG pozvala je da se, na ponovljenom glasanju na vanrednim parlamentarnim izborima, u subotu, na cetinjskom biralištu "Lovćenski partizanski odred" II, glasa za Socijaldemokratsku partiju (SDP).
SDP-u je za ulazak u parlament potrebno dodatnih 295 glasova na Cetinju.
"Kada je u pitanju tematika parlamentarnih izbora, Stara Garda LSCG je imala svoja zasebna politička gledišta sa kojima je upoznala kolege iz SDP-a prije održavanja istih. Kako smo tada saopštili tako smo i postupili, nikoga nijesmo obmanuli! Naše je da zidamo svoju političku kuću! Iz tih i ostalih razloga smo i formirali našu političku organizaciju. Ipak, kada smo već došli u nove momente i sami foto finiš izbornog procesa u kojem se ponavljaju izbori na jednom biračkom mjestu na Cetinju, pozivamo ljude koji su bliski Staroj Gardi LSCG, a koji svoje biračko pravo ostvaruju na biračko mjesto LPO 2, da svoje glasove usmjere ka aktuelnom gradonačelniku i nosiocu liste SDP-a, Nikoli Đuraškoviću, iz ličnih i cetinjskih razloga. Iskoristimo ovu jedinstvenu priliku i svojim glasavima oduzmimo poslanički mandat onima protiv kojih se borimo cijeli život", objavili su iz Stare garde LSCG-a na Fejsbuku.
( B.H. )