Lamar Odom ponovo u Lejkersima bar na jedan dan
Trenutno su u toku pregovori sa klubom iz Los Anđelesa da Odom potpiše jednodnevni ugovor i da tako zvanično završi karijeru
Lamar Odom, nekada zvijezda NBA lige i američki reprezentativac, prolazi kroz završnu fazu rehabilitacije i odvikavanja od upotrebe droge i alkholola.
On je prije dvije godine čudom preživio višestruke srčane udare, koje je izazvala ogromna količina narkotika, a nedavno je priznao da je godinama svakodnevno i u svim prilikama koristio kokain.
Kada završi proces oporavka, postoji mogućnost da se ponovo aktivira i zaigra za Lejkerse!
Više je, doduše, u pitanju simbolika nego košarka, ali trenutno su u toku pregovori sa klubom iz Los Anđelesa da Odom potpiše jednodnevni ugovor i da tako zvanično završi karijeru.
"Moja porodica insistira da budem bar na još jedan dan pravi košarkaš, da se oprostim kako dolikuje, da me ljudi pamte kao igrača Lejkersa, a ne kao nekog ko je zamalo uništio svoj život", rekao je 37-godišnji Odom, koji je sa Lejkersima osvojio dvije titule - 2010. i 2011, kada je bio i najbolji šesti igrač lige.
( Vijesti sport )