Sloboda iz Tuzle lak zalogaj
EFD Budućnost startovala pobjedom u regionalnoj ligi u e-Footballu u modu 3v3
E-fudbaleri Budućnosti, koji su sinoć na otvaranju regionalne lige u modu 3 na 3 igrali protiv Slobode iz Tuzle, ostvarili su očekivanu pobjedu i to ubjedljivom igrom i rezultatom 0:3.
Podgoričani su dominantno započeli pohod na još jedan trofej u multi - modu, igrom koja je od početka do kraja naslućivala konačnog pobjednika.
Plavi su ranim golom sjajnog Borisa Bajovića načeli mrežu protivnika, a malo prije kraja prvog poluvremena, kardinalnom greškom odbrane Slobode, duplirali prednost preko kapitena Bojana Tatara, tako da je već na odmoru pitanje pobjednika bilo riješeno.
Komšije iz Bosne i Hercegovine nijesu imali nijedan odgovor na fantastičnu igru Budućnosti, koja je pored izuzetne igre u odbrani, konstantno rešetala golmana protivnika. Početkom drugog poluvremena, Tatar je iskoristio još jednu grešku protivnika i tako zatvorio duel prvog kola regionalne lige, koja se organizuje pod okriljem BEO asocijacije i Arena Esport televizije.
Ovom ubjedljivom pobjedom, Podgoričani su već zaposjeli na prvo mjesto tabele, a rezultati premijernog kola su:
NK Istra - Crvena Zvezda 1 - 1
Lokomotiva Zagreb - Partizan 0 - 1
Pelister Bitolj - Maribor 0 - 2
NK Mladost - Radnički Niš 1 - 1
RFK Novi Sad - OFK Beograd 0 - 0
Plave sada očekuje duel u HFP Ligi Šampiona u istom modu, u petak od 21.30.
( Marko Vuletić )