Arsenal plesao protiv Brajtona, Aston Vila ima najbolji učinak u istoriji

Serija Brajtona od 32 utakmice u Premijer ligi u kojima je postigao makar gol je prekinuta na "Emirejtsu".

Mogli su gosti nekako i da zatresu mrežu Arsenala, ali ne i da izbjegnu poraz jer je domaćin bio dominantan - slavio je 2:0, pored dva gola imao još sedam-osam velikih šansi koje je na sve načine zaustavljao Bart Verbrugen.

Na kraju će se pamtiti da su ga matirali Gabrijel Žezus u 53. i Kai Haverc u 89.

Gabrijel Martineli, Bukajo Saka i Martin Edegor su svako malo bili u dobroj prilici za pogodak, dugo su "galebovi" čuvali 0:0, ali početkom drugog poluvremena su poklekli kada je Žezus poslije kornera sa druge stative neometan poslao loptu u mrežu.

Dominacija tima Mikela Artete se nastavila i nakon vođstva, a konačno je Brajton morao da prihvati poraz u finišu poslije kontranapada koji su otvorili Leandro Trosar i Edegor, a Haverc pogodio poslije asistencije Edija Nketije.

"Uživao sam zbog načina na koji smo igrali, iako je rezultat dugo bio negativan po nas. Imali smo 15 šuteva i mnogo šansi u prvom poluvremenu, ali jednostavno nismo bili ni mirni ni precizni kada je trebalo", rekao je Arteta.

Brajton je u finišu kod 1:0 imao jedinu pravu šansu.

"To je Premijer liga. Slične situacije vidimo u svakoj utakmici - 1:0 često ne bude dovoljno", dodao je Arteta.

S odličnim rezultatima je nastavila Aston Vila, ovog puta je slavila u gostima protiv Brentforda.

Bilo je 2:1 poslije preokreta s igračem više, a trijumf su joj donijeli Aleks Moreno i Oli Votkins.

Ovo je "lavovima" 25. pobjeda u 2023. godini, što je najbolji učinak kluba u istoriji.

Vila je ove kalendarske godine osvojila čak 81 bod, više ima samo Mančester siti.

Dilema nije postojala u duelu Vest Hema i Vulverhemptona - slavili su "čekićari" 3:0 uz dva gola Mohameda Kudusa i jedan Džeroda Bouvena, te tri asistencije Lukasa Pakete.

( A. H. )