Brnabić o rezoluciji o Srebrenici: Pirova pobjeda zapadnih sila, nastavljamo da radimo s njima
Brnabić je za RTS ocijenila da je Srbija pokazala kako se bori za svoje interese, svijet i međunarodno pravo i nije dozvolila da bude "stigmatizovan naš narod"
Predsjednica Skupštine Srbije Ana Brnabić ocijenila je danas da Rezolucija Generalne skupštine Ujedinjenih nacija (UN) o Srebrenici predstavlja "Pirovu pobjedu i faul velikih zapadnih sila".
UN imaju 193 države-članice, a Rezolucija o Međunarodnom danu sjećanja na genocid u Srebrenici usvojena je juče sa 84 glasa za, 19 protiv i 68 uzdržanih.
Brnabić je za RTS ocijenila da je Srbija pokazala kako se bori za svoje interese, svijet i međunarodno pravo i nije dozvolila da bude "stigmatizovan naš narod".
"Ovo je sve sada jako svježe i jednu stvar koju sam naučila od (predsjednika Srbije) Aleksandra Vučića je da ne treba ishitreno reagovati", rekla je ona.
Tako je odgovorila na pitanje o budućim odnosima zvaničnog Beograda sa državama evropskog kontinenta koje su podržale Rezoluciju, a kojoj se Srbija protivi.
"Sve što ću reći je prilično emotivno....meni će lično biti izuzetno teško da dalje radim sa državama koje su bile sponzori i kosponzori te rezolucije", kazala je.
Rekla je da će se "u svakom trenutku" osjećati mnogo bliže državama koje su glasale protiv, bile uzdržane, ili su napustile salu pri izglasavanju rezolucije.
"Treba svakako da nastavimo da radimo sa našim partnerima i to je u našem nacionalnom interesu i sa zemljama članicama EU", kazala je.
Rekla je i da će "u svakom trenutku" uvijek biti uz države koje su u UN bile uz Srbiju, te se zahvalila svima koji su podržali stavove Beograda.
( BETA )