Džang Jimou će režirati filmsku adaptaciju knjige "Problem tri tijela"
Roman objavljen 2008. autora Liju Cisina u Kini je već adaptiran u animiranu i igranu seriju, kao i radio dramu
Džang Jimou, vlasnik više Zlatnih medvjeda i autor filmskih hitova kao što su "Heroj" i "Kuća letećih bodeža", režiraće filmsku adaptaciju knjige "Problem tri tijela", prenosi Variety.
Osnivač studija Enlight Media Vang Čangtijan je rekao da je Džang u fazi ranih priprema za film. "Nadamo se da će donijeti inovacije i uspjeti na međunarodnom tržištu", kazao je on.
Džang je već snimio nekoliko filmova za jedan od najvećih kineskih studija.
Roman objavljen 2008. autora Liju Cisina u Kini je već adaptiran u animiranu i igranu seriju, kao i radio dramu. Preveden je na 30 jezika,a ranije ove godine Netfliks je objavio svoju verziju serije za međunarodno tržište, visokobudžetno ostvarenje na kojem su radili Dejvid Beniof i D.B. Vajs, publici poznati po radu na seriji "Igra prijestola".
Naučna-fantastika, žanr koji je svojevremeno bio anatemisan u kineskoj filmskoj industriji, tokom posljednje decenije postao je mejnstrim u toj zemlji, oslikavajući njen tehnološki napredak.
( S.S. )