Lebron i Broni prvi put igrali zajedno i ispisali istoriju
Lejkersi izgubili od Finiksa 118:114
U NBA je sinoć ispisana istorija - košarkaši Los Anđeles Lejkersa, Lebron Džejms i njegov sin Broni prvi put su bili zajedno na terenu, pa su postali prvi otac i sin koji su igrali u isto vrijeme u jednoj ekipi.
U predsezonskoj utakmici Lejkersa i Finiksa odigranoj u Kaliforniji, koju su Lejkersi izgubili 118:114, Broni Džejms je u drugoj četvrtini ušao u igru, dok je na terenu bio Lebron, koji se sprema za svoju 22. sezonu u najjačoj košarkaškoj ligi na svijetu.
Lebron je igrao 16 minuta, a postigao je 19 poena, uz pet skokova, četiri asistencije i četiri izgubljene lopte.
Sa druge strane Broni za 13 minuta nije uspio da se upiše u strijelce, a imao je dva skoka i četiri izgubljene lopte. Njega su Lejkersi izabrali u drugoj rundi ovogodišnjeg drafta.
Kada je riječ o Finiksu, najefikasniji je bio Okogi sa 15 poena.
( S. Nj. )