Sitiju dovoljan jedan gol, Bornmut u 96. zaustavio Aston Vilu

Mančester siti je uradio domaći zadatak u susret nedjeljnom derbiju Arsenal - Liverpul.

Aktuelni šampion je preuzeo prvo mjesto poslije utakmice u kojoj nije briljirao niti imao problema da dođe do nova tri boda - savladao je Sautempton na „Etihadu” 1:0.

Početak meča je nagovještavao mnogo više golova, ali Siti je „izabrao” mirnije rješenje, pa mu je trijumf donio Erling Haland golom u 5. minutu.

Siti sada ima dva boda više od Liverpula, a šest od Arsenala koji se sastaju u nedjelju od 17.30 na „Emirejtsu”.

Okliznula se Aston Vila i remizirala protiv Bornmuta na „Vila parku” - 1:1.

Sve je išlo ka tome da tim Unaija Emerija upiše šesti trijumf, vodio je od 76. minuta i gola Rosa Barklija, ali su gosti navijače na „Vila parku” utišali u šestom minutu sudijske nadoknade kada je pogodio Evanilson.

Sedam golova je viđeno u duelu Brentforda i Ipsviča - 4:3.

Gosti su rano poveli 2:0, domaćin stigao do preokreta, da bi Ipsvič s igračem manje poravnao na 3:3. Ostao je, ipak, bez boda, jer se u 96. upisao Brajan Embeumo.

Drugi bod u sezoni je osvojio Vulverhempton, iako je u Brajtonu gubio 2:0 do samom finiša - remi (2:2) donijeli su mu Rajan Ait-Nuri i Mateus Kunja.

( A. H. )