Basari nagrada jednoglasno

Dobitnik regionalne književne nagrade “Ćamil Sijarić” je Svetislav Basara, autor knjige “Rekapitulacija”, saopštio je predsjednik žirija Kemal Musić, na jučerašnjoj konferenciji za novinare u Bijelom Polju.

Centar za kulturu “Vojislav Bulatović Strunjo” u Bijelom Polju ove godine je ustanovio regionalnu književnu nagradu “Ćamil Sijarić” za najbolje prozno djelo u Crnoj Gori, Srbiji, Bosni i Hercegovini i Hrvatskoj.

U izboru je bilo 17 proznih knjiga koje su predložili selektori i članovi žirija iz Crne Gore i tri susjedne države a odluka za knjigu Svetislava Basare bila je jednoglasna, kazao je Musić.

U najužem krugu bile su i knjige: “Rat” Miljenka Jergovića, “Posijecite visoko drveće” Nikole Nikolića i “Anadolovo pismo” Zlatka Topčića.

Pored Musića članovi žirija bili su Draško Došljak iz Crne Gore, Petar V. Arbutina iz Srbije, Dijana Hadžižukić iz BiH i Sinan Gudžević iz Hrvatske.

“Smatram da je nagradom Svetislavu Basari podignuta visoko ljestvica i da će ova nagrada, s obzirom na to da je ovo prva godina dodjeljivanja, postići svoju afirmaciju onako kako to zaslužuje književno djelo Ćamila Sijarića i da ce 18. decembar, datum rođenja Ćamila Sijarića i datum dodjele nagrade, biti datum okupljanja najboljih regionalnih pisaca i jedan veliki praznik književnosti i kulture”, kazao je Musić.

Pred žirijem, kako je kazao književnik i književni kritičar, član žirija i selektor za knjige iz Srbije Petar Arbutina, nije bilo ni malo lak zadatak jer je nagrada okupila najbolje pisce, što je obavezalo članove žirija da odaberu knjigu koja će, na neki način, afirmisati sve ono što je karakterisalo Ćamilovo djelo kao visok stepen jezičke ostvarenost, a da opet njegovo djelo ne profiliše odluke u tematsko-motivacijskom smislu.

“Ćamil SIjarić je jedan univerzalni pisac koji je paradigmu vlastitog zavičaja podigao na jedan književni, univerzalni, semantički nivo. Trudili smo se da to budu jezički i stilski ostvarene i neku ruku savršene knjige. Knjiga Svetislava Basare se nametnula kao jedna kompaktnija knjiga, nešto što je u određenoj mjeri pokazalo kritičku svijest koja ne postoji više u tom nekom metaforičkom nivou”, kazao je Arbutina, dodajući da se u toj knjizi najbolje vide pukotine naše društvene stvarnosti.

Direktor Centra za kulturu Edin Smailović je kazao da je nagrada, pored njenog nesumnjivog književnog značaja i važna tačka povezivanja između književnih stvaralaca regiona, ali i država i naroda.

“Nagrada će biti uručena 18.decembra, a pored svečane, biće upriličena i promocija nagrađene knjige i promocija Zbornika radova o književnom djelu Ćamila Sijarića koji je priredio Faruk Dizdarević”, kazao je Smailović.

Ćamil Sijarić je rođen u Šipovicama kod Bijelog Polja 1913. godine. Završio je Gimnaziju u Vranju, a Pravni fakultet u Beogradu. Među najznačajnijim djelima su mu romani “Bihorci”, “Konak”, “Kuću kućom čine lastavice”, “Mojkovačka bitka”, knjige pripovijedaka “Ram Bulja”, “Bunar”, “Kad djevojka spava, to je kao da mirišu jabuke”, te knjige poezije “Lirika” i “Koliba na nebu”.

Ćamil Sijarić je dobitnik najznačajnijih književnih nagrada u bivšoj Jugoslaviji, a njegova djela prevedena su na dvedesetak svjetskih jezika. Bio je član Crnogorske i Bosansko-herecegovačke akademije nauka i umjetnosti.

( Jadranka Ćetković )