Zarubica: Ako povedemo sve je moguće
"Bilo bi sjajno kada bismo poveli do poluvremena, ali i da se to ne desi, ne smijemo da odustajemo. A, ako povedemo, pa makar i u drugom poluvremenu, onda je sve moguće", kaže 24-godišnji napadač
Sutjeska ima plan kako da napravi podvig u revanšu i pokuša da eliminiše Levski, uprkos porazu od 3:1 u prvom meču u Sofiji.
Naravno, puno lakše je planirati, nego sve to ostvariti na terenu, ali Nikšičani vjeruju u podvig.
"Iako smo izgubili u Sofiji sa dva gola razlike, ne smijemo da srljamo u revanšu i odmah krenemo glavom bez obzira, jer bi nam primljeni gol višestruko otežao posao. Dakle, oprezno i strpljivo treba da tražimo put do njihove mreže, istovremeno vodeći računa o našoj", kaže Dejan Zarubica, napadač Sutjeske.
Za prvi gol nikad nije kasno...
"Bilo bi sjajno kada bismo poveli do poluvremena, ali i da se to ne desi, ne smijemo da odustajemo. A, ako povedemo, pa makar i u drugom poluvremenu, onda je sve moguće", dodaje 24-godišnji napadač.
Svjesni su, naravno, svi u taboru ekipe Nikole Rakojevića da je Levski veliki favorit, i sa i bez prednosti od 3:1 iz prve utakmice, ali kažu da im optimizam uliva drugo poluvrijeme meča u Sofiji.
"Bila je to jako čudna utakmica, maltene smo krenuli iz minusa, primili gol u 13. sekundi, i to našom greškom. A onda sredinom poluvremena, pa još jednom na kraju. Gubili smo 3:0, ali kada smo se opustili u nastavku, kada smo se dobro postavili na terenu, vidjeli smo da sa Levskim može da se igra. Nadam se da ćemo u revanšu tako igrati cijeli meč", ističe Zarubica.
Sutjeska će kraj Bistrice imati dodatni adut - podršku sa tribina.
"Očekujemo da će stadion biti pun, da će nam navijači dati vjetar u leđa. Obećavamo da na terenu nećemo posustajati", zakjučuje Zarubica.
( Dl. M. )