Arsenalu samo bod u Brajtonu

Arsenal je imao tri prilično lake pobjede u Premijer ligi u posljednjih desetak dana, ali je 2025. godinu otvorio remijem.

Tim Mikela Artete je korak unazad u pokušaju da sustigne Liverpul napravio u Brajtonu - bilo je 1:1, a dva boda je izgubio nakon neopreznog faula i penala koji je skrivio Vilijam Saliba.

Igrao se 61. minut kada su se Saliba i Žoao Pedro sudarili glavama, a nešto kasnije je brazilski napadač bio siguran sa bijele tačke - postavio je tako konačan rezultat.

„Tobdžije” su prije toga uglavnom kontrolisale stvari i stvorile nekoliko dobrih šansi u prvom poluvremenu, a jednu od njih i iskoristile preko mladog Itana Envanerija u 16. minutu.

Kasnije je Brajton stvorio pritisak, na 1:1 imao i bolje šanse za trijumf, ali se rezultat nije promijenio.

Arsenal tako uz dva meča više ima pet bodova manje od lidera Liverpula koji u nedjelju dočekuje Mančester junajted.

( A. H. )