U susret Svjetskom danu igre: Dvije jednočinke trupe "Ballo"
Ljubitelji savremenog pokreta vidjeće komad nastao kao spoj dvije koreografske prakse
Dvije jednočinke “Daj mi ruku” i “Ići kroz…” Baletske trupe Ballo biće izvedene večeras u Velikoj sali Kulturno-informativnog centra “Budo Tomović” u 20 sati. Ulaz je besplatan.
Lljubitelji savremenog pokreta biće u prilici da pogledaju predstavu nastalu kao spoj dvije koreografske prakse, njemačkog autora Mikael Onesoa i domaćih koreografa Tamare Vujošević Mandić i Slavke Nelević.
“Dva su povoda za predstojeći nastup u KIC-u 'Budo Tomović': prvi je proslava svjetskog dana igre koji se obilježava svake godine krajem aprila, tačnije dvadeset devetog, a drugi je naše gostujuće igranje u Italiji, Teatru San Domeniko iz Kreme 22. aprila. Ovo gostovanje je nastavak naše dugogodišnje saradnje sa italijanskim kompanijama i teatrima, a osobito sa umjetničkim direktorom Frankom Ungarom, koji već dugi niz godina prati dešavanja na pozorišnoj sceni Balkana“, kazala je koreografkinja Tamara Vujošević Mandić.
Komadom “Ići kroz…” Baletska trupa “Ballo” je po drugi put bila nagrađena na Bijenalu crnogorskog teatra 2014. godine.
“Nagrade su podstrek za dalji rad i nose teret odgovornosti da se sljedećim projektom jednako kvalitetno posvetimo promociji savremenog pokreta i baleta u Crnoj Gori“, istakla je druga koreografkinja Slavka Nelević.
U predstavi igraju Ana Babac, Marko Radonjić, Nina Braletić, Julija Milačić, Jelena Simić, Ana Raspopović i Damjan Senić.
( Kultura "Vijesti" )