Japanke ne smijete da nosite cijelo ljeto

Mada ravna ljetna obuća nikad nije bila popularnija, već se dugo vrijeme vode rasprave o tome koliko je zapravo ona loša za stopala. Popularne japanke, plastične ili gumene papuče za plažu ili natikače s krznom, koje su veliki hit unazad nekoliko sezona, bez sumnje su hit obuća koja se savršeno uklapa u mnoge ljetne kombinacije, ali su stekle lošu reputaciju zato što ne pružaju pravi oslonac za stopala.

Kao rezultat toga noge su izložene većem pritisku i moraju napornije “raditi” kako bi pružile oslonac tijelu. Osim toga, ako ih često nosite, osjetljiva koža stopala brže će se isušivati.

Ipak, stručnjaci se slažu kako nošenje ovakve obuće ima i svoje prednosti, poput toga da ako ih nosimo povremeno i bez pretjerivanja daju slobodu našim stopalima te ne ograničavaju poput drugih vrsta zatvorene obuće – svakako ako u npr. japankama ne pješačite nekoliko kilometara.

Ljekari kažu kako uvijek pri kupovini treba dati prednost natikačama koje su anatomski oblikovane i imaju čvršći oslonac kako nam se noge ne bi umarale u njima.

U ovakvu obuću vrijedi uložiti više novca, dodaju, kako ravne natikače ne bi uzrokovale probleme sa stopalima ili mrske žuljeve i natiske pa birajte modele provjerenih brendova.

Kako bi se spriječilo pretjerano isušivanje stopala, nemojte zaboraviti na hidratizovanje kože kvalitetnim kremama, a radi prevencije žuljeva na stopalima prilikom nošenja ljetne obuće stavite malo pudera ili dezodoransa za noge, prenosi Ljepota i zdravlje.

( Vijesti online )