"Nacionalizam raste, sve je korumpirano, a mislimo da smo najbolji"

Da piscu nije mjesto samo za radnim stolom, uvjerila nas je Rumena Bužarovska. Osim što piše angažovanu, feminističku prozu, ova Makedonka je prije dvije godine bila dio tzv. “šarene revolucije”, koja je srušila vladu premijera Nikole Gruevskog.

"Koliko to god bilo teško, nekako se pomjerila ta kritička misao kod nas. Prije su svi bili uspavani, a sad imamo novu vladu, opet imamo puno novih i starih problema, ali nemamo taj osjećaj straha, imamo osjećaj slobode da možemo da kažemo ono što mislimo", kaže makedonska spisateljica.

Šarena revolucija ipak je, kaže, iznevjerila žene koje su u njoj učestvovale.

"Žene su bile jako aktivne u toku tih protesta, čak su bile u prvim redovima, i onda su ljudi počeli govoriti kao “Makedonija je žena”, jer kao žene su hrabre, bolje i sve te floskule, ali nakon toga su formirali novu vladu, imali smo lokalne izbore, i vidite kako su žene nakon svega toga užasno nisko zastupljene na političkim pozicijama, bilo ih je nešto oko 4 odsto", kaže Bužarovska.

Upravo tu situaciju, mjesto žene u balkanskim društvima i opstajanje rigidnih formi patrijarhata Bužarovska slika u svojim pričama, a na sajmu knjiga u Podgorici je predstavila nedavno prevedenu zbirku “Moj muž”, objavljenu prije četiri godine.

"Meni je bitno da publika vidi taj neki zadrti patrijarhat koji je predstavljen u mojim pričama. Mi imamo sličnu kulturu, imamo istu povijest, slično razmišljamo i imamo iste probleme što se tiče politike, patrijarhalno, tradicionalno društvo, posttranzicijsko, jako korumpirano, i naravno da su problemi slični", ističe ona.

Smatra da je teško odgovoriti zašto nismo smislili ništa novo i ništa bolje nakon raspada Jugoslavije.

"Da vam pravo kažem, ali mi se čini da nešto nije u redu sa nama, očito. Imali smo sve one ratove, sve se raspalo, nacionalizam raste, svi smo siromašni, sve je korumpirano, imamo nonstop neke probleme, a nekako mislimo da smo najbolji", kaže Bužarovska.

( Matija Otašević )