Votson i Teler ostali bez uloga zbog izvolijevanja

Ema Votson i Majls Teler navodno su “napravili pakao” svojim agentima, jer su propustili glavne uloge u filmu “La La Land”, koji je zaradio rekordnih 14 nominacija za Oskara.

Ove role u ostvarenju retelja Demijana Šazela pripale su Emi Stoun i Rajanu Goslingu, a oboje su kandidati za najprestižnije filmsko priznanje.

Kako piše Page Six, Teleru je ponuđeno četiri miliona dolara za glavnu ulogu, ali je on zahtijevao šest miliona.

“Votson je prvo odbila glavnu žensku ulogu, a zatim je počela da postavlja sulude zahtjeve, recimo da se sve probe moraju održavati u Londonu! Producenti su uradili sve da joj izađu u susret, ali ona nije mislila da je to prava uloga za nju”, rekao je izvor ovog portala.

Šazel je ranije kazao samo da nije uspio da angažuje ovo dvoje glumaca za film, ali je muzički direktor “La La Landa” Marijus De Vris bio rječitiji.

“Počeo sam da radim s njom. Onda je jednog dana došla i zamolila me da joj pomognem oko pjesama za drugi projekat (Ljepotica i zvijer). Mislio sam da bi to bilo dobro kako bismo se zbližili, pa sam pristao. Snimili smo par Diznijevih numera koje je ona poslala reditelju tog filma, a kada je, zbog rasporeda snimanja, trebalo da odluči između dva projekta izabrala je Ljepoticu umjesto Mije. Zato smo morali da tražimo drugu glumicu”, kazao je on.

Prema riječima insajdera, oboje glumaca su, nakon što su objavljene nominacije za Oskara, pobjesnili i okrivili svoje agente za to što im nisu obezbijedili uloge u ovom filmu.

( Mirela Zogović )