Ulcinj: Mještani naselja Pinješ i Meterize muku muče sa nestašicom vode
"Za visoke zone iz Regionalnog vodovoda plaćamo 15 litara vode u sekundi tako da je moguće da nije bilo pritiska ali sigurno ne isključenja", kazao je Avdiu
Mještani visokih zona u ulcinjskim naseljima Pinješ i Meterize već sedmicama muku muče sa nestašicom vode dok direktor JP Vodovod Fehmi Avdiu najavljuje stabilizaciju napajanja već od danas.
"Tačno je da imamo problema zbog niskog vodostaja na izvorištima u Gaču i Klezni. Već danas ili sjutra biće u funkciji nova pumpa na izvorištu Lisna Bori što će nadomjestiti nedostajuće količine vode za visoke zone", kazao je Avdiu "Vijestima" navodeći da su razlog niskog vodostaja na izvorištima suše neubičajene za ovo doba godine.
Mještani Pinješa i Meteriza negodovali su, jer kako tvrde, vode do kasnih večernjih sati nemaju i po dva do tri dana sedmično. Niko im ne najavljuje isključenja niti znaju razloge zašto su bez vode. Ogorčeni su, jer kako kažu, o tome ne vodi niko računa čak ni kada su praznici.
Avdiu je kazao da nije bilo isključenja jer se visoke kote snadbijevaju redovno vodom iz Regionalnog vodovoda.
"Za visoke zone iz Regionalnog vodovoda plaćamo 15 litara vode u sekundi tako da je moguće da nije bilo pritiska ali sigurno ne isključenja", kazao je Avdiu.
( Samir Adrović )