U prepunoj barskoj galeriji “Velimir A. Leković” svoje radove su izlagali polaznici umjetničkog ateljea “Dalijas” pod mentorstvom slikara Jasmine i Dalibora Dada Ćetkovića. Izložba pod nazivom “Stvaranje i snovi” predstavila je radove najmlađih umjetnika sa raznolikim motivima - od portreta do apstrakcije.
Izložbu je otvorio dr Milun Lutovac, upravnik barske galerije, kazavši da je Crna Gore zemlja slikara da je ova postavka posebna jer prikazuje radove mladih barskih talenata. Poručio je da se na ovaj način stvara mlada, ali i buduća umjetnička publika.
“Ovo što radi atelje ‘Dalijas’ je za svaku pohvalu. Sve ovo što je večeras ovdje izloženo smatram kao školu odrastanja kroz rad, stvaranje i nadu, kao što i sama izložba nosi ime. Prezadovoljan sam što se nastavlja naša saradnja i nadam se da ćemo imati razlog opet da se okupimo i da od entuzijazma porodice Ćetković napravimo jednu malu instituciju koja će ući u istoriju grada Bara”, istako je Lutovac.
Atelje “Dalijas” ima 48 polaznika, od šest do 19 godina a tokom izložbe je bilo vidno oduševljene publike, roditelja ali i samih malih umjetnika što svoje radove vide u galerijskom prostoru. Automobili, Bar, Stari Bar, omiljene igrice, umjetnici, glumci, pjevači, životinje i pejzaži naslikani rukom i kroz oko djeteta sa oko 50 radova ukrasili su zidove barske galerije.
Dalibor Dado Ćetković kazao je da se pred njima te noći otvorio jedan čarobni svijet, svijet u kojem linije i boje plešu, a oblici pričaju priče. Svojim radovima, izloženim na ovim panoima, mladi stvaraoci ateljea Dalijas, nanovo pokazuju ne samo svoje talente, već i radost stvaranja, naporan rad i strast prema umjetnosti.
“Kroz različite crtačke i slikarske tehnike, stilove i rukopise, učenici su se temeljno bavili rješavanjem likovne problematike i permanentnim izražavanjem. Naime, njihovo znanje i vještine, stečene kroz predani rad sa svojim mentorima, jasno se ogledaju na svakom platnu i listu papira. No, ono što nas najviše fascinira nije samo tehnička savršenost, već i iskrena ljubav prema stvaranju, koja se prožima kroz svako njihovo djelo”, poručio je Ćetković.
On je kazao da znatiželjni pogledi mladih umjetnika uvijek traže nove motive, sa zadovoljstvom uplovljavaju u svijet mašte, stvarajući svoje vlastite svjetove, ili pak vjerno prenose stvarnost na svojim radovima, bilo po zadatku ili svojoj želji.
“Na ovoj izložbi prepoznajemo težnju ka realizmu, dok je uočljiv put od impresionističkih pikturalnih pejzaža preko ekspresionističkih crteža, pa sve do apstraktnih formi. Izrada svakog portreta, pejzaža, mrtve prirode, životinja i ostalih motiva, zahtijevaju ogromno strpljenje uz veliki rad. Zato je ova izložba dokaz istrajnosti i upornosti naših učenika, koji znaju da samo velikim trudom mogu ostvariti zapažen rezultat”, ocijenio je.
Njihovi polaznici, po Ćetkovićevim riječima, pokazuju da je kreativnost nešto što se može njegovati i razvijati, a s njom dolazi i volja za učenjem i željom za postizanjem novih ciljeva. U ateljeu su naučili da slušaju svoje mentore, da su radoznalo istraživali i da vjeruju u svoje sposobnosti. Ova izložba je samo mali dio njihovog umjetničkog puta, a oni se iskreno raduju što imaju priliku dijeliti s publikom njihovo stvaralaštvo.
Mladim umjetnicima je poručio da im ova izložba i uspjeh koji su do sada postigli bude izvor inspiracije i motivacije, a svijet umjetnosti bude uvjek pun razigranih linija i veselih tonova, kako na paleti tako i u životu.
“Budite i dalje tako vrijedni i predani, jer ovdje se krije inspiracija i životna motivacija koju ćemo svi zajedno dijeliti i potruditi se da kroz umjetnost učinimo svijet ljepšim”, poželio im je.
On se zahvalio Kulturnom centru Bar i Umjetničkoj galeriji Velimir A. Leković na čelu sa upravnikom dr Milunom Lutovcem, na ukazanom povjerenju i uvrštavanjem ove nesvakidašnje izložbe u plan i program galerije, kao i pokroviteljima naše organizacije Opštini Bar i Turističkoj organizacij Bar, koji im je i ove godine, kao i prethodne za najposjećeniju izložbu pod nazivom “Talenti grada Bara”, dala podršku da nastave i dalje priređivati Baru ovakve i slične događaje.
On se posebno zahvalio roditeljima koji su prepoznali talenat kod svoje djece i doveli ih u njihov atelje na dalje usavršavanje, kao i njihovim mladim saradnicima, koji će, on se nada, znati cijeniti sve što im se pružalo i prepoznati prave vrijednosti, pa jednog dana nastaviti gdje oni stanu.
Bonus video:
