Baš kao i koža lica i tijela i kosa može biti suva, to znaju svi koji imaju posla s takvim tipom kose. Uz to, kosa je izloženija štetnim uticajima, bilo da je riječ o farbanju, stilizovanju uz korištenje toplote ili pogrešnom načinju pranja. To posebno to dolazi do izražaja u ovim hladnijim mjesecima kada se nosimo sa suvim vazduhom u zatvorenim prostorima gdje je upaljeno grijanje. Iako se čini da su tretmani kod frizera jedino rješenje, to nije baš tako. Mogu vam pomoći domaće maske za kosu koje ćete napraviti od sastojaka koje već imate u kuhinji.
Kosa će nakon što je nahranite biti mekana, a ne suva i oštra. Čarolija ovih tretmana je u tome što su jednostavni, brzi i jeftini, a rezultati su vidljivi odmah.
Kokosovo ulje i med
Kokosovo ulje hidratizuje i omekšava kosu i to dok istovremeno sprječava lomljenje kose zbog visokog udjela masnih kisjelina. Ono puno dublje prodire u vlasi od običnog regeneratora i zbog toga je kosa nakon njega meka i sjajna. Med kosi vraća prijeko potrebnu vlagu. Osim toga, med je emolijent koji zaglađuje kosu dok hidratizuje vlasište. Zbog toga su maske za kosu s ovim sastojcima idealne, piše journal.hr.
Uputstvo: Pomiješajte jednake količine kokosovog ulja i meda. Prilagodite količinu dužini, gustoći i teksturi kose. Nanesite na cijelu dužinu kose, osim ako imate masno tjeme, u tom slučaju nanosite otprike od ušiju do vrhova kose. Ostavite da djeluje 20 minuta, a zatim operite kosu kao i inače.
Jaja, maslinovo ulje i majonez
Ova moćna kombinacija odlično hidratizuje izrazito suvu kosu. Majonez dubinski hrani kosu i vraća joj sjaj. Velika količina proteina iz jaja zadržava vlagu u kosi. Maslinovo ulje prepuno je masnih kiselina koje uklanjaju oštećenja i štite kosu od budućih oštećenja. Ovo je maska savršena za suvu kosu, ali i maska koja podstiče rast kose.
Uputstvo: Pomiješajte šoljicu majoneza, pola šoljice maslinovog ulja i tri žumanceta. To nanesite na kosu i prekrijte je kapom za tuširanje. Ostavite da djeluje 20 minuta i isperite. Najprije koristite mlaku vodu da se jaje ne bi 'skuvalo', a onda operite kosu kao i inače.
Banana, jogurt i med
Ova maska zapravo dobro funkcioniše kao pakovanje za suvu kosu. Banane su prepune vitamina, kalijuma i ugljenih hidrata koji zajedno rade kako bi vlagu zadržali u kosi. Jogurt je pun mlječne kisjeline koja vraća sjaj i popravlja oštećenja na kosu. Med hidratizuje kosu.
Uputstvo: Pomiješajte jednu bananu s dvije kapike jogurta i kašikom meda. Sve to sjedinite i nanesite na vlažnu kosu. Stavite kapu za tuširanje i držite oko pola sata. Isperite šamponom i nanesite regenerator.
Maske za kosu s limunom i jajetom
Jaja su bogata proteinima, vitaminima A, D i E i masnim kisjelinama koje vraćaju sjaj kosi. Kisjelost limuna na sebe privlači višak ulja i masnoća s tjemena. Ova maska je idealna jer sastojke gotovo sigurno već imate. Odlična je za suvu kosu, ali takođe i za pročišćavanje kose kojoj vraća sjaj.
Uputstvo: Odvojite bjelance od žumanceta koje ćete koristiti za ovu masku. U njega iscijedite pola limuna i sjedinite ih. Nanesite na vlažnu kosu od korijena do vrhova, prekrijte kapom za tuširanje i ostavite da djeluje 30 do 45 minuta, operite kosu šamponom i regeneratorom.
Čaj vraća sjaj kosi
Baš kao što vraća naš organizam u život, čaj isto radi i sa suvom kosom. Konkretno, u pitanju je crni čaj koji beživotnoj kosi vraća sjaj. Zato, ako vam negdje stoji kutija crnog čaja, koji vam baš i nije preukusan, iskoristite ga da nahranite kosu. Osim što će pomoći suvoj kosi, on može oživjeti i kovrdže ako su vam se malo opustile.
Uputstvo: Skuvajte malo crnog čaja i ostavite ga da odstoji dok se ne ohladi. Natopite kosu čajem i ostavite da odstoji 10 minuta. Isperite kosu i uživajte u rezultatima.
Nahranite kosu maslacem
Ne zvuči baš primamljivo, ali maslac kosi može pružiti mekoću i hidrataciju koja joj nedostaje.
Uputstvo: Nekoliko kašika maslaca sobne temperature umasirajte u kosu. Kosu zamotajte ili prekrijte kapicom za tuširanje i ostavite sat vremena. Nakon toga operite kosu.
Jabukovo sirće
Jabukovo sirće ključno je za uklanjanje ostataka proizvoda koji kosu otežavaju. Kada ga pomiješate s arganovima uljem, on omekšava kosu.
Uputstvo: Dvije do četri kašike jabukovog sirćeta pomiješajte s malo manje od dva decilitra mlake vode. Razmjera jabukovog sirćeta i vode treba da bude 1:3. Nakon pranja kose šamponom i regeneratorom, tu mješavinu umasirajte u tjeme. Za najbolji efekt ostavite da djeluje nekoliko minuta pa isperite toplom vodom. Kosa će vam biti sjajna i zdrava.
Maslinovo i kokosovo ulje
Kombinacija ulja možda se čini malo preteška, ali činjenica je da će dubinski njegovati kosu. Ovu maska preporučuje se osobama s gušćom, jačom i kovrčavom kosom.
Uputstvo: Pomiješajte jednake količine maslinovog i kokosovog ulja i zagrijte mješavinu. Toplota ulja otvoriće kutikule vlasti i ulja će dublje prodrijeti u kožu glave. Ostavite 10 minuta na kosi, prekrijte kapom za tuširanje i nakon toga isperite šamponom i toplom vodom.
Med i mlijeko
Ako imate tanku i oštećenu kosu i želite domaći tretman koji će je oživjeti, tu su med i mlijeko. Med sadrži kreatin koji ojačava kosu i sprječava pucanje vlasi. Takođe, potiče regeneraciju ćelija za zdravije tjeme, a može i ublažiti iritaciju i upalne procese. Kada se med pomiješa s mlijekom, koje je puno proteina masnih kiselina, vitamina B12, gvožđa i cinka, to može omekšati kosu.
Uputstvo: Nabavite bocu sa špricom, u njoj pomiješajte šoljicu mlijeka i kašiku i poprskajte kosu nakon šampona – umjesto regeneratora. Ostavite da djeluje 10 do 20 minuta i isperite toplom vodom.
Smeđi šećer i kokosovo ulje
Zvuči kao recept za kolače, ali nije, radi se o hranjivom tretmanu za kosu. Smeđi šećer i kokosovo ulje pomoći će ako vas muči suvo tjeme koje svrbi. Granule smeđeg šećera biće odličan piling za tjeme i ukloniće mrtvu kožu. Kokosovo ulje, pak, može stimulisati rast i usporiti opadanje kose jer prodire duboko u vlasi. Uz to, ono hidratizuje kosu, vraća joj sjaj i pomaže kod sprječavanja lomljenja kose.
Uputstvo: Pomiješajte dvije kašike smeđeg šećera i kašiku kokosovog ulja. Umasirajte u kosu i tjeme nakon šamponiranja. Isperite i nanesite regenerator.
Bonus video:
