Argentinci i FIFA obilježili su u petak na Svjetskom prvenstvu u Kataru dvije godine od smrti slavnog Dijega Maradone.
Nekoliko hiljada argentinskih navijača okupilo se na trgu u Dohi kako bi odali počast Maradoni i izrazili podršku svojoj reprezentaciji.
Ulice Dohe bile su preplavljene argentinskim zastavama dok su gomile skandirale Maradonino ime i pjevale pjesme njemu u čast.
"Previše nam nedostaje. Uvijek je bio uz nas. Još ga osjećamo. Siguran sam da će gledati reprezentaciju gdje god bio", rekao je jedan navijač Argentine.
Selektor Argentine Lionel Skaloni rekao je uoči današnje utakmice protiv Meksika da se nada da će "donijeti malo radosti Maradoni gledajući ih s neba".
Predsjednik FIFA Đani Infatino rekao je da je Dijego besmrtan i da je još tu, dodavši da će na svakom Svjetskom prvenstvu u budućnosti biti dan rezervisan za sjećanje na Maradonu.
"Italijan sam i navijam za Inter. Nisam ni Argentinac ni navijač Napolija, ali moram priznati da je Dijego više puta rasplakao Inter i ostale italijanske klubove. Ipak, svidjelo nam se. Bio je veliki vođa u Argentini, Južnoj Americi i širom svijeta. Moramo ga nastaviti slaviti. Emotivan sam, volio bih da je ovdje na ovom Svjetskom prvenstvu. Ali on je u našim srcima”, rekao je Infantino koji se nekoliko puta susreo s Maradonom i, kako kaže, postali su dobri prijatelji.
U Buenos Ajresu osvanuo je ogromni mural Maradone u dresu reprezentacije.
Maradona je od 1982. do 1994. nastupio na četiri svjetska prvenstva, a 2010. bio je selektor reprezentacije. Više od 30.000 Argentinaca otputovalo je u Katar na Svjetsko prvenstvo i dok mnogi poštuju Messija, Maradonino ime i dalje ima gotovo mističnu moć.
Mnogi navijači još uvijek na utakmicama nose maske i zastave s njegovim likom.
Maradona je preminuo 25. oktobra 2020. od srčanog udara u dobi od 60 godina, u svom domu dok se oporavljao od operacije mozga.
Bonus video:
