Čile je konačno dobio ono što je čekao 99 godina, od prvog dana postojanja kontinentalnog takmičenja - „la roha” je osvojila titulu na Kopa Americi pobjedom protiv Argentine na Nacionalnom stadionu u Santjagu!
Bilo je 4:1 nakon penala, pošto u 120 minuta šaha selektora Horhea Sampaolija i Herarda Martina golova nije bilo. Čile je tako iz petog puta u finalu konačno razbio maler, a Argentinci moraju još da čekaju ono što nisu uradili još od 1993. godine. Lionel Mesi tako nije krunisao perfektnu klupsku sezonu trofejom sa reprezentacijom.
I Čile i Argentina su mogli da pobijede i prije penala - Arturo Vidal, Aleksis Sančes, Esekjel Laveci i Markos Roho su bili najbliži pogotku, ali kao da je bilo suđeno da Čileanci prvi trofej osvoje na penale.
Sva četiri šuta sa bijele tačke Čile je pogodio (Mati Ernandes, Vidal, Arangis i Sančes), kod Argentinaca je strijelac bio samo Mesi, pa su tragičari postali Gonsalo Iguain (šutirao visoko preko gola) i Ever Banega kojeg je zaustavio Klaudio Bravo.
Sančes je posljednji penal šutirao „panenkom” i izrastao u junaka, iako je realno bio jedan od slabijih igrača Čilea na turniru...
"Ovo je za čileanski narod koji je čekao previše na ovu titulu. Konačno smo im je donijeli", rekao je Vidal, lider vjerovatno najbolje ekipe Čilea svih vremena.
Ovo je bio tek treći put u istoriji Kopa Amerike da je finale riješeno nakon penala.
Prije Čilea na isti način su šampioni postali Urugvajci 1995. i Brazil 2004. kada je pobijedio upravo Argentinu.
"Albiseleste" je i dalje iza Urugvaja kada je broj titulu na ovom takmičenju u pitanju - "urusi" su najtrofejniji sa 15.
Ono što je utjeha Argentini je to što će na novu šansu čekati samo do narednog ljeta, a domaćin jubilarnog 100. izdanja Kopa Amerike biće Sjedinjene Američke Države.
Bonus video:
