Milan je pred svojim navijačima poražen od Intera, a gol odluke postigao je defanzivac Samuel u 3. minutu.
Nakon meča, trener “rosonera” Masimilijano Alegri bio je ljut na sudiju Paola Valerija, za koga smatra da je sudio na štetu njegove ekipe.
Milan nije uspio da osvoji ni bod iako je praktično čitavo drugo poluvrijeme igrao sa igračem više nakon što je crveni karton dobio Juto Nagatomo (48. minut).
“Nikada ne pričam o sudijama, ali ovog puta sam primoran. Jednostavno, pravili su previše grešaka. U prvom poluvremenu Valeri je napravio tehničku grešku, svirao je kraj 12 sekundi ranije. Tada je Urbi Emanuelson fauliran od posljednjeg igrača odbrane Intera. Možda je bio i penal nad Robinjom, a Nagatomo je zaslužio crveni karton. Ovo nije izgovor, možda sudija nije imao svoj dan, ali ove stvari su bile očigledne”, rekao je Alegri.
Milan je sada na 11. mjestu na tabeli sa sedam bodova, 12 manje od Juventusa i Napolija koji su na čelu tabale.
“Sezona nije gotova, ima još da se igra. Moramo da se borimo, moramo da unaprijedimo neke stvari u igri. Ne mogu da zamjerim igračima ništa što se tiče zalaganja, ali treba pas da bude brži i precizniji. Protiv Intera smo pokušali da širimo igru, ali je teško igrati sa ekipom koja se 80 minuta brani”, zaključio je Alegri.
Bonus video:
