Češka fudbalska bajka počela je u baražu pobjedom nad Crnom Gorom, nastavila se na Evropskom prvenstvu - četa Mihala Bileka ide u četvrtfinale, ni manje ni više nego kao lider grupe A!
To je senzacionalni epilog mečeva posljednjeg kola prve faze u kojima su Petr Čeh i društvo demonstrirali mirnoću, kvalitet i karakter da umire Poljake u njihovoj kući i ostvare fenomenalan uspjeh, i to bez ponajboljeg igrača u polju, povrijeđenog Tomaša Rosickog.
Sa druge strane, jedan od domaćina Eura oprašta se posramljen, bez pobjede, sa dva remija i kao posljednji u grupi.
- Ovo je san, ovo je istorija. Idemo da slavimo, pa ćemo razmišljati o narednom protivniku, u četvrtfinalu. Samo ne pomislite da ćemo da se zadovoljimo na ovome - blistao je Bilek.
Ispisana je istorija i u bukvalnom smislu - Češka je postala prva ekipa u istoriji Evropskih prvenstava koja je takmičenje u grupi otvorila porazom, a završila ga kao lider grupe!
Okršaj posljednjeg i narednog rivala Crne Gore u takmičarskim mečevima pokazao je da ekipa Branka Brnovića ima čemu da se nada pod Goricom 7. septembra, ali u cijelom ciklusu kvalifikacija.
U meču u kojem se nisu krile karte, jer šanse za popravni nije bilo, Česi su se pokazali kao bolji tim od Poljske u svim elementima igre - tehničkom, trkačkom i psihološkom, jer je u momentima kada se lomila utakmica igralo samo pred poljskim golom.
Baš kao u prethodne dvije utakmice na turniru, Poljaci su dobro počeli, stvorili nekoliko šansi, a onda izdušili kao novogodišnji balon. Od 20. do 90. minuta nigdje ih nije bilo na terenu...
Česi, koje je vođstvo Grčke protiv Rusije u Varšavi povuklo da jače krenu u napad (bod im ne bi bio dovoljan) strpljivo su pleli mrežu i koristili šansu u 71. minutu - Milan Baroš je povukao kontru, crnogorski dželat iz baraža Petr Jiraček utrčao iz drugog plana i prizemnim šutem potvrdio klasu! Lopta je završila u mreži, a cijela češka klupa na terenu Gradskog stadiona u Vroclavu.
Baš kao Češka, i Poljska je morala da napada, ali ne od vođstva Grka u 45. minutu, već od početka meča. Ipak, selektor František Smuda samo je udarao pesnicom o klupu...
- Nismo iskoristili naše šanse na početku, protivnik je igrao odličan fudbal i kaznio nas u nastavku. Bez obzira na ovo ispadanje, ekipa je pokazala veliki progres. Za dva mjeseca počinju kvalifikacije i vjerujem da ćemo se plasirati na Mundijal u Brazilu - izjavio je Smuda.
Pitanje je samo da li poljska javnost dijeli njegovo mišljenje o progresu.
ČEŠKA - POLJSKA 1:0
Vroclav - Gradski stadion. Gledalaca: 41.800. Sudija: Kreg Tomson (Škotska). Strijelac: Jiraček u 71. minutu. Žuti kartoni: Limberski, Plašil, Pekhart (Češka), Muravski, Polanski, Vasilevski, Blaščikovski, Perkis (Poljska).
Češka: Čeh, Gebre Selasie, Kadlec, Sivok, Limberski, Plašil, Pilarž (Režek), Hubšman, Kolarž, Jiraček (Rajtoral), Baroš (Pekhart)
Poljska: Titon, Beniš, Vasilevski, Perkis, Pišček, Dutka, Polanski (Grosicki), Obranjak (Brojk), Muravski (Merzejevski), Blaščikovski, Levandovski.
Galerija
Bonus video:
