Nakon trijumfa nad Liverpulom, Mančester junajted je pobijedio još jednog velikog rivala - "đavoli" su na "Old Trafordu" savladali Arsenal 3:1 i poslali poruku da je kriza iza njih.
Ekipa Erika ten Haga je nakon dva startan poraza upisala četvrtu pobjedu zaredom, dok je Arsenal pretrpio prvi poraz u sezoni.
Odličan dan je iza fudbalera Junajteda, a najviše će ga pamtiti Antoni. Mladi Brazilac je prije nekoliko dana u transferu vrijednom 95 miliona eura prešao iz Ajaksa u Mančester i već na debiju postigao gol. U 35. minutu je Bruno Fernandeš fauliran, sudija ispravno pustio prednos, Sančo proigrao Rašforda koji je asistirao Antoniju za erupciju na stadionu.
Bio je Junajted bolji rival na startu, šansu je u devetom minutu imao Eriksen, da bi nakon toga Ramsdejl odbranio udarac Sanču.
I Arsenal je na startu prijetio, priliku je imao Saliba, a i Martineli je postigao gol, ali je arbitar nakon konsultacije sa VAR-om poništio taj pogodak.
Mančester je sa golom prednosti otišao na odmor, a onda je u nastavku prvi do gola stigao Arsenal. Edegor je ubacio loptu u šesnaesterac, Varan je ispao, a Dalo u želji da otkloni opasnost asistirao Saki, koji je zatresao mrežu.
Nakon toga na scenu je stupio Markus Rašfrod. Engleski reprezentativac se odlično snalazi u ulozi najisturenijeg igrača, a danas je sjajnu partiju krunisao sa dva pogotka. Prvo je u 66. minutu sjajno istrčao kontru i lagano matirao Ramsdejla, da bi u 75. nakon još jedne dobre akcije i asistencije Eriksena postavio konačan rezultat.
Bonus video:
