Velika pobjeda nad Cedevitom i gotovo perfektna igra, pogotovo u prvom poluvremenu, iznenadila je i trenera Budućnost Volija Luku Pavićevića.
Podgoričani su na spektakularan način osvojili Zagreb, slavili sa čak 81:57 i 10. uzastopnom pobjedom u ABA ligi praktično osigurali 1. mjesto pred plej-of.
“Čestitam igračima na izvanrednoj pobjedi, koju smo zaslužili najviše fenomenalnom igrom u prvom poluvremenu. Bilo je jasno da je Cedevita nakon sjajnih utakmica u Beogradu i Istanbulu za nas bila velika motivacija”.
“Velikim angažmanom u odbrani i napadu smo stekli ubjedljivu prednost u prvom poluvremenu, čime smo praktično riješili meč. Sada nam preostaje da se i dalje spremamo za svaku utakmicu kao i za ovu, a s obzirom na trenutnu situaciju, možemo da se nadamo 1. mjestu na kraju regularnog dijela sezone”, rekao je Pavićević.
Kapiten Suad Šehović je priznao da Cedeviti i umor bio rival.
“Znali smo da će Cedevita poslije dvije velike i važne pobjede biti malo istrošena i fizički i psihički. To smo iskoristili i na kraju lagano pobijedili. Sigurno je, ipak, da nisam očekivao da se ovako nešto može dogoditi. Presudila je naša kvalitetna odbrana, a i to što smo bili odmorniji od Cedevite”, naglasio je stariji Šehović, koji je ubacio 10 poena.
Trener Cedevite Veljko Mršić rekao je da nije ljut na svoje igrače. "Budućnost je u svakom segmentu igre bila bolja i dominantnija. Gosti su bili brži, aktivniji i čvršći. Na početku smo promašili četiri-pet otvorenih šuteva. Tada smo potonuli i nismo više uspjeli da izvučemo. Bili smo iscrpljeni, a Budućnost je dokazala da je zasluženo na 1. mjestu. Imala je osam dana između dvije utakmice i to se osjeti”, istakao je Mršić.
Bonus video:
