Na krilima Dirka Novickog, Dalas je u prvom meču finala Zapadne konferencije stigao do pobjede protiv Oklahome. Njemac je bio šuterski raspoložen i u drugom duelu, ubacio je 29 poena (16 u trećoj četvrtini), ali na njegovu, kao i nesreću Dalasa, na drugoj strani su blistali Kevin Djurant (24 poena, tri skoka, četiri asistencije) i Džejms Harden (23 koša, sedam uhvaćenih lopti, četiri asistencija) i Oklahoma je napravila brejk pred duele na svom terenu.
"Uvijek sam vjerovao da imam dobre igrače na klupi, pokazalo se to u ovom meču. Međutim, kada dobijete, onda je presudan timski rad", rekao je Skot Bruks, trener Oklahome.
I zaista su rezervisti dali veliki doprinos pobjedi. Dali su 50 od 106 poena Tundersa (Harden 23, Erik Mejnor 13), dok je klupa Dalasa ubacila samo 29 koševa.
U većem dijelu meča vodila se izjednačena borba u kojoj su gosti bili u blagoj prednosti. Sedam minuta prije kraja Maveriksi su prišli na pola koša zaostatka (90:91), ali se tada probudila Oklahoma. Napravila je seriju 11:2 i nešto više od tri minuta prije kraja otišla na plus deset (102:92).
Domaćini su uzvratili sa šest uzastopnih poena i ubačenim slobodnim bacanjima Dešona Stivensona i došli su na četiri poena zaostatka minut prije kraja. Ipak, u penal završnici gosti su bili mirne ruke i došli su do prvog slavlja u finalnoj seriji.
"Ako čitavu posljednju četvrtinu Rasel Vestbruk provede na klupi, a mi nismo dobili, onda je zaista teško. Međutim, “kredit” je dobio Mejnor, koji je šansu iskoristio", rekao je Novicki.
Dalas - Oklahoma 100:106 (Novicki 29p, 5sk, 5as, Čendler 15p, 13sk, Kid 13p, 7as, Barea 11p, 4as - Djurant 24p, 3sk, 4as, Harden 23p, 7sk, 4as, Vestbruk 18p, 4as, Mejnor 13p) - rezultat u seriji 1:1.
Treći duel igra se u Oklahomi u noći između subote i nedjelje po našem vremenu u 4 sata.
Bonus video:
