Golden Stejt je izjednačio na 2:2 u seriji na četiri pobjede u finalu NBA lige savladavši sinoć u gostima sa 107:97 Boston, a do pobjede ga je vodio Stef Kari sa 43 poena.
Kari, čiji je nastup bio neizvjestan zbog povrede stopala, imao je šut iz igre 14/26 od čega 7/14 za tri.
Nakon prve četvrtine u kojoj je upisao 12 poena bilo je jasno da mu povreda neće smetati. Kari se povrijedio u trećoj utakmici nakon duela sa Alom Horfordom.
Klej Tompson je dodao 18 poena, a Endrju Vigins 17 uz 16 skokova za Voriorse. Džordan Pul je ubacio 14 za GS koji je utakmicu završio serijom 17:3 u zadnjih pet minuta.
Kod Bostona najbolji je bio Džejson Tejtum sa 23 poena, 11 skokova, šest asistencija i tri blokade. Džejlen Braun je upisao 21 poen, Markus Smart 18, a Derik Vajt 16.
Smart je ubacio trojku za vođstvo Bostona 94:90 5:18 minuta prije kraja, ali su Voriorsi odgovorili s deset poena zaredom. Vigins je pogodio za dva, Tompson za tri, pa Kari za 97:94 3:49 minute do kraja.
Ni jedna ekipa nije poentirala više od dvije minute prije nego je Kari upisao svoju sedmu trojku manje od dvije minute prije kraja za vođstvo gostiju od šest razlike...
Peta utakmica se igra u ponedjeljak u San Francisku.
Bonus video:
