Jovanović: Pokazali smo reakciju poslije 12. minuta, natjerali smo rivala na teške šuteve

Prvi meč poslije FIBA „prozora” je, po pravilu, uvijek rizičan za Budućnost Voli.

Vladimir Jovanović je dugo bio bez devet igrača koji su nastupali za nacionalne timove Crne Gore, BiH, Srbije, Kanade, Gvineje i Belgije, pa je ekipa odradila svega dva zajednička treninga.

Zadar je to umalo kaznio, jer je u „Morači” vodio 30:14, ali su se „plavi” izvukli, završili meč serijom 7:0 i slavili 69:68.

„I u najavi sam pomenuo da smo 10. februara imali posljednji zajednički trening pred Kup, na kojem nisu igrali svi stranci, a potom je bio FIBA ‘prozor’, zato se nismo skupili sve do srijede. Imali smo dva zajednička treninga, očekivao sam jako tešku utakmicu i zbog toga, ali i činjenice da Zadar igra dobru i atipičnu košarku, sa pet igrača koji su iza linije za tri poena”, rekao je Jovanović.

Zadar je stvarao dosta problema igrom jedan na jedan, pogotovo Luka Božić.

„Veliki su na svim pozicijama, pogotovo na jedan, dva i tri, mogu da naprave problem na niskom postu... U odbrani otvaraju dosta situacija rivalu za tri poena. Ako ih date, onda je super, ako promašite ulazite problem sa samopouzdanjem. Drago mi je da smo pokazali reakciju poslije 12. minuta, natjerali rivala na teške šuteve. Sveli smo Zadar na mali broj poena, a na drugoj strani pogodili neke teške šuteve, mada smo mogli da nađemo lakša rješenja”.

U timu nije bilo Trea Bel-Hejnsa, koji je sa zavojem oko prsta sjedio pored klupe.

„I poslije prethodnog ‘prozora’ smo imali problem sa dva prsta - Kamenjaša i Atića. Bel-Hejns je na treningu u četvrtak igrao agresivno u odbrani, nabio prst na loptu, a to zahtijeva nekoliko dana pauze. Nije ništa slomio, ali mu je skroz ‘izletio’, zbog čega je morao da ide kod doktora da ga namjesti. Za dva-tri dana će odraditi dijagnostiku, pa ćemo vidjeti kada će se vratiti”, naglasio je Jovanović.

Treneru Zadra Danijelu Jusupu je žao što je njegov tim „izdušio” kada se rješavalo.

„Dobar dio utakmice smo kontrolisali, ali zavisimo od intenziteta. Igramo dosta brzo, dosta trčimo i tako pravimo probleme protivniku, ali padne intenzitet kad uđu igrači s klupe. Umjesto da smo doveli jednog igrača, mi smo ostali i bez Jordana, a sa njim bi bila puno veća šansa da ovakve utakmice dobijemo. Zadar igra jako dobru košarku, taj intenzitet nam je donio mnogo toga dobrog”, napomenuo je Jusup, a onda ocijenio da je Marko Jagodić-Kuridža bio ključni igrač.

„Kuridža nam je pravio dosta problema, ne samo poenima, već i time što je otvarao prostor za saigrače. Evo, Budućnost ima plus 18 kada je on bio na terenu, dobro sam to zapazio”.