U finalu 23. Svjetskog prvenstva za rukometašice sastaće se selekcije koje su i na dva prethodna velika takmičenja osvajale medalje - Norveška i Francuska.
Norvežanke opet djeluju nepobjedivo, jer su u polufinalu savladale Holandiju sa čak 32:23.
U reprizi finala prethodnog šampionata planete, kao i prošlogodišnjih mečeva za titulu na Evropskom prvenstvu, odnosno za 3. mjesto na Olimpijskim igrama, nikakvih dilema nije bilo.
Rukometašice Torira Hergeirsona su odmah pokazale da su mnogo bolje, povele 7:1 i trasirale put ka novoj ubjedljivoj pobjedi i čak 21. finalu na velikim takmičenjima.
Na prvenstvima svijeta imaju po tri zlatne, srebrne i bronzane medalje, vidjećemo kojeg će sjaja biti deseta...
Nora Merk je bila najefikasnija u pobjedničkim timu sa osam golova, šest je dala Stine Oftedal, a pet treća članica sjajne bekovske postave, Veronika Kristijansen. Kod „lala” je pet postigla Laura van der Hejden.
U drugom polufinalu su obje ekipe igrale na mahove. Francuska je vodila 10:6, Švedska preokrenula na 12:10, a onda opet došla na minus tri i vraćala se u život.
U završnici je u junakinju Francuske izrasla Alison Pino, koja je minus i 25 sekundi prije kraja pogodila za 23:22, potom iznudila probijanje Hane Blomstrand, da bi sve dileme otklonila Klodan Danse za konačnih 24:22.
Bonus video:
