Glavni tužilac Haškog tribunala Serž Bramerc sjutra dolazi u Beograd i možda će on razjasniti nejasnoće o tome kako je donesena odluka o povratku lidera Srpske radikalne stranke (SRS) Vojislava Šešelja u Hag, piše danas B92.
Nakon sedam mjeseci od povratka iz Haga, Šešelj bi uskoro ponovo mogao da se nađe u ćeliji u Ševeningenu, međutim kako piše B92, ostalo je nejasno kako je Žalbeno vijeće Haškog tribunala donijelo odluku o povratku Šešelja, bez izjašnjavanja Pretresnog vijeća koje mu sudi.
"Očigledno javnost tumara u mraku zato što je bila stvar na Pretresnom vijeću. Žalbeno vijeće nije ni moglo da donese odluku. Naša država ima priliku da se iz ove neprijatnosti izvuče, štiteći istovremeno prava svog državljanina, a s druge strane, ukazujući da postoje nezakonitosti od strane Haškog tužilastva", kaže advokat Borivoje Borović, a prenosi B92.
Borović, koji je zastupao više okrivljenih u Hagu, objašnjava da nije jasan ni pravni osnov prema kome Hag traži da Vlada Srbije reaguje, pošto je Šešelj skoro bez uslova pušten na slobodu. Zahtjev za ekstradiciju Šešelja, on vidi, kao mogući pravni osnov.
"Ovdje može da se sprovede postupak ekstradicije, sto znači da bi Šešelj mogao da dobije prava da pred našim nacionalnim sudom dokazuje da nije bilo suđenja u razumnom roku. Mogao bi da dokazuje da upravo zbog same bolesti ne postoje uslovi za njegovo izručenje", dodaje on.
Za to vrijeme radikali poručuju da se njihov lider ni po koju cijenu neće predati dobrovoljno, ali da se neće ni skrivati.
Potpredsjednica SRS-a Vjerica Radeta navodi da su stranačke kolege zabrinute zbog Šešeljevog zdravlja.
"Mi oko njega smo veoma zabrinuti zato što je predsjednik počeo da prima hemoterapiju, i ako se vrati u Hag on će prekinuti sa tom hemoterapijom i to može biti fatalno", kaže Radeta.
Služba za saradnju sa medijima Tribunala nije mogla da potvrdi informaciju da je Žalbeno vijeće donijelo bilo kakvu odluku u vezi sa Šešeljem i njegovom povratku u pritvorsku jedinicu tribunala.
Glavni tužilac Haškog tribunala Serž Bramerc posjetiće sjutra Beograd, a njegova poseta je, kako saznaje B92, dogovorena još prije dva mjeseca i nije inicirana zahtjevom da se Šešelj vrati u Hag.
Međutim, očekuje se da će on pojasniti nejasnoće o samom načinu na koji je ta odluka donesena.
Bonus video:
