Zbog kvara na avionu španskog avioprevoznika Vueling oko 170 ljudi noć sa subote na nedjelju provelo je na dubrovačkom aerodromu.
Avion je, kako piše Index.hr, po planu letjenja trebalo da poleti u subotu oko 13:30 sati, a uzletio je tek juče u 18 sati.
"Tačno je. 170 putnika koji su trebali putovati iz Dubrovnika za Barselonu prespavalo je na aerodromu. Neki su se snalazili tako što su uzeli letove drugih kompanija kako bi došli do svojih domova", rekao je za DubrovnikNet.hr direktor dubrovačke vazdušne luke, Roko Tolić.
Posada je, prema njegovim riječima, u jednom trenutku ušla u avion i ukrcala putnike, ali nakon toga su ih iskrcali kazavši da avion nije siguran. Vuelnig je, kako je dodao, u nedjelju ujutro ponovno htio da putnici idu istim avionom za Barcelonu, ali oni su to odbili.
Tolić je naveo i da je dubrovački aerodrom učinio sve što je u njihovoj moći da olakšaju boravak putnika koji su čekali.
Sa aerodroma (Foto: Index.hr)
Putnici su proveli noć na aerodromu jer nigdje u Dubrovniku i okolini kompanija Vueling nije mogla pronaći smještaj za 170 ljudi, s obzirom da zbog špica sezone nema slobodnih kreveta.
Posada aviona morala je spavati u Herceg Novom.
Intervenisala policija
Ljuti putnici noć su bili prisiljeni da provedu na aerodromskim klupama u tranzitnoj zoni. Intervenisala je i policija, zbog povišenih tonova i napetosti među putnicima.
Jedan putnika, Jose Ligero, na svom je Twitter profilu je izvještavao o tome šta se događa na dubrovačkom aerodromu: "Vueling je napustio 167 putnika u tranzitnoj zoni aerodroma u Dubrovniku. Noć moramo provesti na terminalu. Nijesu nam osigurali hotel", napisao je on.
Ligero, koji je putovao sa suprugom i dvoje male djece starih četiri i sedam godina, sa svijetom je podijelio fotografije s dubrovačkog aerodroma: Porodice s djecom su u naručju, prekriveni dekama koje su dobili od aerodroma, spavale na klupama u tranzitnoj zoni.
Putnici su se osim na spavanje na aerodromu putem Twittera požalili i na nedostatak informacija. Jedan od putnika, Carlos Torres, na svom Twitter profilu napisao je kako je posada aviona rekla da je bilo teško doći po njih u Dubrovnik jer su imali slobodan dan.
Galerija
Bonus video:
