Opozicija u Albaniji danas je održala protest u glavnom gradu, Tirani, zahtijevajući da vladu zamijeni tehnokratski prelazni kabinet prije parlamentarnih izbora sljedeće godine.
Konzervativna opozicija optužuje ljevičarsku vladu da manipuliše tim prijevremenim izborima i da uzurpira vlast, uključujući pravosuđe.
Demokratska partija bivšeg premijera Saljija Beriše posljednjih nedjelju dana održava proteste u Parlamentu nakon što je njihov kolega Ervin Salijanji osuđen za klevetu, a Berišina stranka rekla je da je slučaj politički motivisan. Salijanji je 2018. zatražio ostavku tadašnjeg ministra unutrašnjih poslova zbog optužbi o nezakonitim aktivnostima njegovog brata za koje se kasnije pokazalo da su izmišljene.
Salijanji koji od prije više od nedjelju dana izdržava jednogodišnju kaznu zatvora, uložio je Vrhovnom sudu žalbu na presudu.
Demokrate traže kabinet sastavljen od tehnokrata, okrivljujući premijera Edija Ramu iz vladajuće ljevičarske Socijalističke partije da je manipulisao sazivanjem prijevremenih izbora.
Oni su dugo optuživali Ramine socijaliste za uzurpaciju vlasti, uključujući pravosuđe, i organizovali su nasilne proteste protiv vlade još od 2013. godine.
Demokrate takođe traže da se Beriša pusti iz kućnog pritvora u koji je stavljen tokom istrage o navodnoj korupciji.
Opozicija je pozvala na građansku neposlušnost, otpočevši protest okupljanjem ispred glavne zgrade vlade.
Stotine policajaca, opremljenih gas maskama, zauzele su položaje da zaštite glavne državne institucije.
Policija je saopštila da je saobraćaj blokiran u mnogim ulicama u centru Tirane.
Evropska unija i Sjedinjene Države pozvale su opoziciju da nastavi dijalog sa vladom, rekavši da nasilje neće pomoći zemlji da se integriše u Evropsku uniju.
EU je 2020. odlučila da pokrene pregovore o prijemu Albanije, te će ovog mjeseca Tirana početi pregovore o tome kako se usklađuje sa vladavinom prava, funkcionisanjem demokratskih institucija i borbom protiv korupcije.
Bonus video:
