Rusija "ubija i ubijaće teroriste", bili oni u Idlibu, posljednjem uporištu pobunjenika u Siriji, ili negdje drugdje u toj zemlji, izjavila je danas u Moskvi portparolka ruske diplomatije Marija Zaharova.
"Ubijali smo, ubijamo i ubijaćemo teroriste... Nema veze da li su oni u Alepu, Idlibu ili drugim mjestima u Siriji", rekla je Zaharova i dodala da je riječ i o bezbhednosti Rusa.
Četiri ruska aviona bombardovala su u utorak položaje grupe Hajat Tahrir al Šam, bivšeg sirijskog ogranka Al Kaide u Idlibu, provinciji na sjeverozapadu Sirije.
Snage sirijskog predsjednika Bašara al Asada planiraju da preuzmu kontrolu u Idlibu,čiji je veći dio teritorije u rukama te grupe i drugih pobunjenika.
Opoziciona Sirijska opservatorija za ljudska prava saopštila je da je nekoliko stotina civila pobjeglo iz Idliba u strahu od najavljene ofanzive.
Međunarodna zajednica i UN strahuju da bi u slučaju ofanzive došlo do humanitarne katastrofe u Idlibu gdje živi gotovo tri miliona ljudi, među kojima polovinu predstavljaju raseljeni Sirijci, koji su već napustili svoje domove u drugim djelovima Sirije.
U sirijskom ratu započetom 2011. koji je tokom godina postao složeniji sa učešćem stranih zemalja i raznih džihadističkih grupa, poginulo je više od 350.000 ljudi, a nekoliko miliona je raseljeno unutar zemlje ili izbjeglo u susjedne države.
Bonus video:
