Evropska centralna banka (ECB) pokrenula je kontrolu najvećih banaka s ciljem da iskorjenjivanjem loših banaka oporavi sistem kreditiranja u eurozoni.
Prethodni takvi pokušaji drugih službi EU koje su imale manja ovlašćenja, nijesu uspjeli 2009, 2010. i 2011. godine. Neke banke su prošle simulaciju "stres testova" na papiru, ali im je potom bila potrebna pomoć.
Zajedno s nacionalnim službama i Evropskom banakrskom upravom (European Banking Authority), ECB će prvo proći kroz hiljade dokumenata 128 najvećih banka u potrazi za skrivenim, problematičnim zajmovima i investicijama, nakon čega će uslijediti "stres testovi" koji kroz simulaciju treba da ustanove kako bi se banke ponašale u slučaju recesije ili krize.
Kad rezultati budu objavljeni u oktobru, od državnih vlasti će biti zatraženo da natjeraju banke da povećaju kapital prodajom akcija investitorima, ograničenjima dividenti ili restrukturiranjem.
To bi trebalo da pomogne dugoročno, ali je kratkoročno opasno, pošto bi primoravanje banka da riješe probleme privremno moglo destabilizovati finansijska tržišta ili nanijeti gubitke investitorima ili čak vladama.
Ovo će biti najveći ovakav proces u Evropi za rješavanje problema koje je njenom bankraskom sektoru nanijela svjetska ekonomska kriza i dužnička kriza u EU.
Bonus video:
