Vodeća turska opoziciona partija odlučila je danas da poslanik Muharem Indže bude njen kandidat na predstojećim predsjedničkim izborima na kojima će se suprotstaviti turskom predsjedniku Redžepu Tajipu Erdoganu.
Indže (54), oštar kritičar Erdogana, objavio je kandidaturu na današnjem kongresu sekularne Republikanske narodne partije (CHP) i rekao da na izborima 24. juna neće predstavljati samo pristalice svoje stranke nego svih 80 miliona turskih građana, navodi AP.
"Prvo ćemo uspostaviti pravdu. Bićemo nepristrasni. Bićemo nezavisni", obećao je Indže i optužio Erdogana za podrivanje demokratije.
CHP kritikuje Erdogana zbog autoritarnih tendencija i optužuje ga za izvođenje "građanskog puča" - masovni obračun s građanima koji je započeo poslije pokušaja državnog udara jula 2016. godine.
Turske vlasti su od tada uhapsile više od 50.000 ljudi, a oko 110.000 je otpušteno iz javnih ustanova zbog navodnih veza s organizacijom islamskog propovjednika Fetulaha Gulena kog Ankara optužuje da stoji iza pokušaja puča. U zatvoru su i opozicioni poslanici, novinari, aktivisti i drugi neistomišljenici vlasti.
Vladajuća Partija pravde i razvoja (AKP) zvanično je predložila Erdogana kao kandidata na predsjedničkim izborima.
U Turskoj će 24. juna biti održani predsjednički i parlamentarni izbori, prvobitno zakazani za novembar 2019. godine.
Predsjednički kandidat biće i lider opozicione Dobre stranke (IYI) Meral Aksener, bivši ministar unutrašnjih poslova koji se smatra ozbiljnim Erdoganovim protivnikom.
Bonus video:
