Ruska vojska saopštila je danas da je bombardovala oblast kod grada Palmire, uporišta Islamske države u Siriji.
U vazdušnim napadima koje su ruski avioni izveli na mjesto Karjeten, koje pripada antičkom gradu Palmira, kako prenosi Turska radio televizija (TRT) poginulo je 20 civila, a 18 je ranjeno.
Ruski avioni su uništili defanzivni položaj i protivvazdušne sisteme Islamske države u oblasti Palmire, navodi se u saopštenju ruskog Ministarstva odbrane koje dodaje da su bombardovana 237 ciljeva terorista u posljednja dva dana.
Jedan stanovnik Palmire je rekao za agenciju Frans pres da su Rusi pogodili tvrđavu koja se nalaz na brdu zapadno od antičkog grada Palmire i da se ne može provjeriti razmjera štete.
Direktor Sirijske Opservatorije za ljudska prava Rami Abdel Rahman potvrdio je da su ruski avioni bombardovali oblast kod Palmire. Prema njegovim riječima, u napadima je pogođen čuveni antički grad, koji je Unesko svrstao u svjetsku kulturnu baštinu i čije su djelove ekstremisti ranije razorili.
Direktor Antikviteta i muzeja u Siriji Mamun Abdulkarim rekao je za Frans Pres da nema informacije o ruskim napadima na antički grad Palmiru.
Rusko ministarstvo odbrane je naglasilo da su piloti pazili da ne pogode arheološka nalazišta drevnog grada Palmire.
Islamska država je zauzela Palmiru 21. maja i od tada je uništila velike djelove tog čuvenog arheološkog nalazišta.
Rusko ministarstvo je navelo da su ruski avioni imali 121 nalet u posljednja dva dana i pogodili ciljeve u provincijama Hama, Homs, Latakija, Alep, Raka i u oblasti oko Damaska.
Ministarstvo je navelo da je u predgrađu Alepa uništen kamp u kome su se pripremali ekstremistički borci iz inostranstva.
Bonus video:
