Kineski brod i 16 ribara koji su oteli naoružani Sjevernokorejci prije dvije nedjelje oslobođeni su danas, javili su kineski izvori.
Vlasnik broda Ju Suedžun koji nije bio na plovilu kada je oteto 5. maja napisao je na svom mikroblogu da ga je kapetan broda pozvao u 3.50 jutros da mu kaže da su posada i brod oslobođeni i da se vraćaju kući. On je rekao da su svi članovi posade dobro.
Ju je ranije prijavio otmicu kineskim vlastima ali je počeo da daje publicitet tom incidentu preko vikenda kako se približavao rok za isplatu tražene otkupnine od 600.000 juna (100.000 dolara). Tada su kineski državni mediji počeli da izvještavaju o toj otmici, navodeći da Kina zahtijeva od Sjeverne Koreje da oslobodi posadu.
Ju je na svom mikroblogu napisao da nije mogao da plati bilo kakvu otkupninu i zahvalio se kineskom ministarstvu spoljnih poslova što je pregovaralo o oslobađanju ljudi.
Juovi pozivi za pomoć naišli su na veliki odziv na društvenim mrežama u Kini. Jedan visoki kineski oficir General Luo Juan pisao je bijesno o otmici na mreži Sina Veibo, kineskoj verziji Tvitera.
"Sjeverna Koreja je otišla suviše daleko. Čak iako nemate novca ne možete hvatati ljude preko granice i ucjenjivati", pisao je Luo koji je imao više od 300.000 osoba koje su ga pratile na mreži.
Otmica ovog broda je dalje doprinijela kineskom nezadovoljstvu sa Sjevernom Korejom zbog njenih najnovihih nuklearnih proba i proba raketa i pored zahtjeva međunarodne zajednice da zaustavi svoj nuklearni program.
Bonus video:
