Predsjednik Francuske Nikola Sarkozi rekao je da se mora uraditi sve kako bi se spriječilo stvaranje "terorističke ili islamske države" na sjeveru Malija, pošto su pobunjenici osvojili velike površine pustinjskog sjevera zemlje.
Kako prenosi agencija Rojters, vojni udar od 22. marta ohrabrio je tuareške nomade da zauzmu sjevernu polovinu Malija i proglase nezavisnu državu na toj teritoriji.
Islamistički borci povezani sa Al Kaidom nalaze se među pobunjenicima, i analitičari strahuju da bi pustinjska zona mogla da postane raj za agente Al Kaide.
"Moramo da sarađujemo sa Tuarezima i da vidimo kako bi oni mogli da imaju minimum autonomije. Moramo uraditi sve kako bismo spriječili uspostavljanje terorističke ili islamske države u srcu Sahela", rekao je Sarkozi.
Francuska je četvrti po veličini donator Malija humanitarnom pomoći, a takođe obučava i oprema vladine snage.
Bivši predsjednik parlamenta Malija Dionkunda Traore je preuzeo dužnost privremenog predsjednika države u okviru sporazuma koji ima za cilj da se obnovi civilna vladavina nakon puča.
Traore je pozvao separatiste da se povuku iz sjevernih gradova koje su okupirali, uključujući i pustinjsko trgovačko mjesto i sjedište islamskog učenja, Timbuktu, i grad Gao.
Francuska je savjetovala oko 5.000 svojih državljana koji žive u Maliju da napuste zemlju.
Bonus video:
