Prvi nepotpuni rezultati predsjedničkih izbora u Senegalu održanih u nedjelju daju veliku prednost opozicionom kandidatu Basiruu Diomajeu Fajeu, međutim kandidat vladajuće koalicije Amadu Ba poručuje da će pobjednik biti poznat tek nakon drugog kruga izbora.
Za sada je pet od ukupno 19 kandidata na predsjedničkim izborima čestitalo Fajeu na pobjedi.
Bivši senegalski premijer i kandidat vladajuće koalicije Amadu Ba je, pak, kazao da su čestitke i slavlja na ulicama preuranjeni, piše Rojters.
"Uzimajući u obzir povratne informacije našeg tima, sigurni smo da ćemo, u slučaju najgoreg scenarija, imati drugi krug izbora", naveo je u izjavi njegov izborni štab.
Dan izbora je prošao bez incidenata.
Malo više od pet miliona ljudi, prema podacima državne televizije, odnosno 71 posto birača, iskoristilo je pravo glasa na petim predsjedničkim izborima u Senegalu.
Izbori su raspisani nakon tri godine političkih turbulencija obilježenih nasilnim protestima protiv vlade i rastom političke podrške opoziciji.
Prema prvim rezultatima koje je objavila državna TV kuća, Faje je osvojio većinu svih glasova, nakon čega su uslijedila slavlja na ulicama glavnog grada Dakara. Njegove pristalice su palile vatromet, mahali zastavama i duvali u vuvuzele.
Međutim, još nije poznato koliko je biračkih mjesta obrađeno, od njih ukupno 15.633.
Konačni privremeni rezultati očekuju se do utorka.
Drugi krug održaće u slučaju ukoliko nijedan kandidat ne osigura natpolovičnu većinu glasova.
Bonus video:
