Palestinski spasioci izjavili su večeras da je u izraelskom napadu na školu UN pretvorenu u sklonište kraj Gaza Sitija, poginulo 14, a ranjeno desetine ljudi.
Izraelska vojska nije odmah odgovorila na zahtjev da komentariše taj napad na školu kojom je rukovodila Agencija UN za palestinske izbjeglice (UNRWA).
U proteklim mjesecima Izrael je izveo desetine vazdušnih udara na škole širom palestinske enklave u koje su se sklonile stotine hiljada Palestinaca raseljenih zbog sukoba.
Hitna služba Civilne odbrane sa sjedištem u Gazi je saopštila da su spasioci iz ruševina škole u izbjegličkom logoru Šati, zapadno od Gaza Sitija duž obale Sredozemnog mora, izvukli 14 tijela.
Izraelski zvaničnici opravdavali su ranije takve napade tvrdeći da Hamas koristi škole kao baze za vojne operacije.
Ubrzo poslije današnjeg napada izraelska vojska je naredila evakuaciju logora Šati i drugih kvartova zapadno od Gaza Sitija.
To je izazvalo paniku među Palestincima koji su u proteklim danima potražili sklonište u tim područjima od obnovljene izraelske ofanzive protiv ekstremista Hamasa dalje na sjeveru.
Od početka rata Hamasa i Izraela koji traje više od godinu dana škole u Gazi su zatvorene i služe kao skloništa.
Libanski poslanik i portparol organizacije Hezbolah Ibrahim al-Musavi izjavio je danas da su male razlike između onih koji su u Bijeloj kući kada se radi o prekidu vatre.
On je rekao da može biti promijene partije koja je na vlasti, ali kada se radi o Izraelu one imaju manje više istu politiku.
"Mi želimo da vidimo akcije, želimo da vidimo da se donose odluke", rekao je Musavi agenciji Rojters.
Američki diplomatski napori da se okonča borba između Izraela i Hezbolaha, uključujući predlog o prekidu vatre od 60 dana su posustali prošle nedjelje prije predsjedničkih izbora u SAD u utorak na kojima je pobijedio bivši američki predsjednik Donald Tramp.
Musavi je rekao da je težak bilans izraelskih napada u kojima se ruši hiljade zgrada uglavnom na jugu i istoku Libana, te u južnim predgrađima Bejruta, gdje dominiraju muslimani šiiti.
On je međutim dodao da su vojne sposobnosti organizacije ostale snažne.
"Naša su srca slomljena, mi gubimo vrlo drage živote. Taj osjećaj da (Izrael) ne može biti kažnjen ili izveden pred međunarodni sud je rezultat podrške SAD koje im daje imunitet od odgovornosti", rekao je libanski poslanik.
"Amerika je u potpunosti partner u onome što se događa jer može da utiče da spriječi ovo razaranje", zaključio je Musavi.
Masad Bulos, svekar Trampove ćerke Tifani, je najavio da će on biti zadužen za pregovore sa libanskom stranom radi postizanja sporazuma o kraju rata, prenio je libanski emiter Al Džadid ove nedjelje.
Uz to je javljeno da Tramp namjerava da okonča rat prije nego što preuzme funkciju u januaru, prenijeli su izraelski mediji.
(Beta)
Jedna žena je ubijena danas u izraelskom napadu u kojem je pogođen automobil na autoputu nedaleko od Bejruta, izjavili su libanski bezbjednosni izvori.
Neimenovani zvanični izvor je rekao i da je jedan muškarac povrijeđen. Automobil je pogođen na autoputu između Bejruta i ravnice Beka i Sirije.
Prema zvaničnoj agenciji ANI, "neprijateljska bespilotna letelica gađala je automobil u Araji", na periferiji Bejruta.
(BETA)
Južni djelovi glavnog grada Libana, Bejruta, jutros su bili na meti napada, sat nakon što je izraelska vojska pozvala stanovnike da se evakuišu, javila je agencija AFP.
Na meti najmanje dva izraelska napada bila su četiri naselja za koja smatra da su uporište proiranskog pokreta Hezbolah.
Na slikama koje je objavila AFP vide se oblaci dima iznad južnog Bejruta, a očevici su prijavili glasne detonacije.
Portparol izraelske vojske apelovao je prethodno na stanovnike četiri južna naselja Bejruta, uključujući i lokacije u blizini međunarodnog aerodroma, da se evakuišu.
(BETA)
Bonus video:
