Prema novom istraživanju, fizička aktivnost tokom učenja stranog jezika povećava sposobnost pamćenja, zadržavanja i razumijevanja riječi. Ovo otkriće ne donosi samo nova saznanja o učenju jezika, već dokazuje da bi za bolje mentalne procese trebalo da budemo fizički aktivni, prenosi Jutarnji.
U posljednjih nekoliko godina sproveden je niz studija vezanih za fizičku aktivnost i učenje ili pamćenje i svaka je pokazala da drugačije učimo ako istovremeno vježbamo, navodi Njujork tajms.
Laboratorijski pacovi tako su pokazivali mnogo bolju sposobnost pamćenja ukoliko bi koristili točak za trčanje. Studenti su imali jednako bolje rezultate na ispitima ako su ih rješavali dok su istovremeno bili fizički aktivni.
Naučnici vjeruju da vježbanje mijenja mozak tako što ga čini prijemčivijim i otvorenijim za nove informacije. Na mnoga pitanja tek treba naći odgovore, kao što su mehanizmi učenja, kada vježba ima najpozitivniji uticaj - prije, za vrijeme ili nakon učenja, i koji tip vježbe bi bio najkorisniji.
Studija je objavljena u naučnom časopisu Plos One, a uključeni su bili Kinezi koji su tokom dva mjeseca učili engleski.
Ispitanici su dobili zadatak da za vrijeme učenja voze sobni bicikl. Osobe koje su vozile bicikl za vrijeme učenja, mnogo su bolje svladale nove riječi od osoba koje su učile u stanju mirovanja. Osim toga, pokazali su bolje prepoznavanje i razumijevanje značenja rečenica, a stečeno znanje su mogli da reprodukuju nakon dužeg vremena.
Bonus video:
