Sutkinja za istragu bjelopoljskog Višeg suda, Vanja Rakonjac, saslušala je danas Eska Erovića (56) iz Osmanbegovog sela na Koristskoj visoravni, zbog pokušaja ubistva komšije Huseina-Huskare Smakića (70) i odredila mu pritvor do 30 dana.
Pritvor je određen zbog mogućeg uticaja na svjedoke, kao i okolnosti da je sa oštećenim u lošim odnosima, te da je ranije osuđivan.
Potezanju pištolja je prethodila svađa oko partije šaha, kada je Erović optužio Smakića da mu je ukrao figuru.
Sutkinja Rakonjac je nakon saslušanja odredila Eroviću pritvor do 30 dana.
Prema rješenju o zadržavanju, Erović je u srijedu, oko 15 časova, pucao iz pištolja nepoznate marke u pravcu Smakića i ranio ga u lijevu ruku, nanijevši mu teške tjelesne povrede.
Erović je u istrazi kazao da nije htio da ga ubije, već da je bio ljut zbog svađe koju su prethodno imali, te da je samo htio da ga zaplaši.
Smakić je ispričao da je sve počelo oko figure šaha, koji su igrali u seoskoj prodavnici, a da je dan kasnije, prolazeći traktorom pored njega, Erović sišao i pucao u njegovom pravcu. On se, kako je objasnio, instiktivno izmakao, kada ga je zrno pogodilo u šaku.
Nakon ranjavanja, on je zbrinut u bjelopoljskoj bolnici, nakon čega je otpušten na kućno liječenje.
Bonus video:
