Tivćanin Mišo Klep ulovio je juče na otvorenom moru, na oko 12 milja jugoistočno od ostrva Mamula, sabljarku težine 50 kilograma. Riba dugačka 2,5 metra već je treća sabljarka koju je Klep ulovio u proteklih nekoliko dana, a dvije prethodne bile su značajno manje od ove.
Klep, inače, lovi sam u barci, pa mu nije bilo baš lako da savlada ovoliko veliku i jaku ribu.
Prošle nedjelje on je uhvatio je i velikog morskog psa-modrulja, teškog između 80 i 100 kilograma, ali se ta epizoda nije uspješno završila za poznatog tivatskog ribolovca.
„Uspio sam naime da privučem modrulja do barke i u tri navrata da ga brankadelom (štap sa jakom čeličnom kukom na vrhu – prim.aut.) uhvatim za rep i pokušam ga ubaciti u čamac. Na žalost, nakon trećeg pokušaja pokidao je najlon i morski pas je mirno otplivao svojim putem,“ ispričao je „Vijestima“ danas Klep, koji je u međuvremenu ulovio i jedno mladunče modrulja, težine 15 kilograma kao i lampugu od 10 kilograma.
Bonus video:
