Blažo Crvenica i Bojan Tešić (Uhura Solutions), kao i Darko Ivanović (The Badger) govorili su na prvom Fuckup Nights Nikšić, koji je imao za cilj da predstavi neuspješne priče uspješnih biznismena i tako motiviše učesnike da ne odustaju od realizacije svojih biznis ideja.
Govoreći o početničkim greškama, poručili su učesnicima događaja da, iako je upornost jako bitna, važno je znati i kada treba odustati i svoje vrijeme i resurse usmjeriti na projekat koji ima bolju perspektivu.
Tako su Blažo i Bojan predstavili startapove Budo Finder i Pronađi čas, na kojima su nekada radili.
”Nakon početne investicije Budo Finder nije uspio da dobije dovoljno finansijskih sredstava za dalji razvoj, a za staratap Pronađi čas su na vrijeme shvatili da ne mogu da monetizuju svoju ideju. Kažu da su loš biznis model i činjenica da su preskočili korak validiranja ideje, bili pogubni za njihove biznise. Iako su oba startapa na kraju propala, znanje koje su stekli radeći na njima postalo je temelj na kome su izgradili Uhura Solutions. Posebno ističu vezu i povjerenje koje se formiralo među članovima tima i dalo im hrabrosti da opet pokušaju”, naveli su organizatori - Inovaciono preduzetnički centar (IPC) Tehnopolis.
Saopštili su da je Ivanović pričao o tome da je prva greška njegovog staratapa The Badger bila pogrešna namjena proizvoda.
”U početku su ga zamislili kao virtuelni bedž, da bi nakon nekog vremena pronašli potpuno drugačiju nišu za svoj proizod. Ređali su se pehovi i izazovi, ali istrajnost i upornost su se na kraju isplatili i The Badger je startap koji iza sebe ima sjajne uspjehe, a sam Darko se može pohvaliti zavidnim iskustvom u startap svijetu i to ne samo kao uspještan startaper već i kao internacionalni startap mentor”.
Učesnici događaja - mladi koji imaju i ideje i želju da pokrenu biznis, iskoristili su prisustvo Crvenice, Tešića i Ivanovića da od njih dobiju koji savjet više, ali i korisne preporuke. Njih trojica su istakli spremnost da pomognu mladim preduzetnicima i startaperima kojima je potrebna podrška, ali i veliki značaj koji Tehnopolis ima u povezivanju i izgradnji startap zajednice.
”Naveli su da se nadaju da će se uskoro i na većim institucionalnim nivoima stvoriti bolji uslovi za razvoj startap ekosistema u Crnoj Gori. Naši gosti su poručili da se najbolje uči iz iskustva, kada izađeš iz zone komfora i da ne treba bježati od neuspjeha, jer ako iz njega nešto naučiš onda to nije poraz - već vrijedna lekcija”.
Događaj je organizovan u okviru projekta 2CODE, koji je sufinansiran sredstvima EFRR i IPA II fondova Evropske unije.
Fuckup nights je globalni događaj koji je nastao u Meksiku 2012. godine, s ciljem da se kroz predstavljanje realnih biznis priča pokaže kako se poslovne greške mogu pretvoriti u lekcije i prilike, kao i da se preduzetnici i početnici u biznisu podstaknu na razumijevanje neuspjeha kao dijela poslovnog poduhvata i da nauče da ga prevazilaze.
Bonus video:
