Najveća zvijezda druge večeri Exit festivala, američki reper Snoop Dogg poznat i kao Snoop Lion, priuštio je svojim obožavaocima nezaboravno veče.
On je na glavnoj bini publici priredio kombinaciju starih hip-hop pjesama i rege zvukova sa najnovijeg albuma "Reincarnated", što sudeći po reakcijama publike bila dobitna kombinacija.
Najveće oduševljenje, ipak je izazvala pjesma "Young, wild and free" iz 2011. u kojoj u originalu gostuje popularni pjevač Bruno Mars.
Drugo veče festivala bilo je sa istim oduševljenjem publike ispraćeno i na Dens areni, gdje je oko tri sata poslije ponoći nastupio Fat Boy Slim uz transparent "Eat, sleep, rave, repeat".
Dens arena je zabilježila nezapamćenu posjetu tokom nastupa ovog velikana elektronske muzike, pa je zbog velike gužve u jednom momentu bila zatvorena za nove posjetioce.
Kako se navodi na sajtu Exita, Fat Boy SLim se sjeća nastupa koji je na ovom festivalu imao prije osam godina i već je unaprijed mogao da pretpostavi da će interesovanje i reakcije publike biti toliko snažne kao sinoć na Dens areni.
Nastupi na Fjužn bini trajali su do pred samu zoru, a najuporniju publiku tada su zabavljali Bad Copy koji su ranije nastupili i kao predgrupa Snoop Doggu.
Prije njih nastupio je Kiril Džajkovski, a publiku je na noge digao i odlično raspoloženi Rambo Amadeus, na čijem nastupu se u više navrata čuo grohotan smijeh publike.
"Prvi put u istoriji šou biznisa uspostavićemo 'gluvi fanki'. Evo vidjećete, mi ćemo u jednom momentu prestati svirati, a vi ćete nastaviti plesati", zabavljao je publiku neumorni Rambo.
Žurke i dobar provod su krenule i na ostalim binama, veliko interesovanje, kao i prethodnih godina, vlada za diskoteku na slušalicama zvanu "Silent Disco", a posjetioci se ove godine hrabro odlučuju da i sami nastupe na karaoke bini, koja najboljima donosi i nagrade.
Prema nezvaničnim procjenama, Exitom je šetalo i plesalo oko 40.000 ljudi, a još veće gužve se očekuje danas kada će nastupiti Prodigy.
Galerija
Bonus video:
