Detroitski reper, koji vuče korijene sa Balkana, Valid nastavlja predstavljanje aktuelnog albuma “Peach Brandy”, te je sa njega publici zajedno sa spotom prezentovao numeru “Places”. U produkciji Lucky Penny Media, Valid u pjesmi “Places” odaje počast i svojoj domovini predaka i gradu koji ga je oblikovao.
Muzički video sadrži autentične kućne snimke vodeći gledaoce nazad u 2005. godinu, posljednji put kad je Valid kao mladić posjetio Srbiju. Istovremeno “Places” slavi prošlost, sadašnjost i budućnost detroitskog hip-hopa i kulture.
“Samo nekoliko dana nakon što je najavio svoju prvu turneju po istočnoj Evropi, koja je zakazana za novembar 2024. godine, Valid objavljuje novi video za pjesmu “Places” koju su producirali crnogorski bitmejkeri Knowhere2run (Todor Tadić) i Vibin wit DJ Mono (Nikola Rajović). Ovaj video odaje počast Balkanu, istovremeno slaveći detroitsku kulturu. Video sadrži snimke mladog Valida u Srbiji, što je u skladu s pričom ispričanom u ovoj pjesmi s albuma “Peach Brandy”. U tekstovima Valid izražava svoju čežnju za Balkanom i nadu da će barem još jednom u životu posjetiti tu regiju. U drugom stihu piše kratko ljubavno pismo svom drugom domu, gradu koji ga je oblikovao - Detroitu”, stoji u saopštenju.
Vođen mentorstvom Gremijem nagrađivanog DJ Heada, Valid se ističe kao moćan MC iz ekpresivne hip-hop scene Detroita. Nakon hvaljenog izdanja debitantskog albuma “Mihajlo” iz 2019. godine, Valid je uložio svoju dušu u EP “Plum Brandy” s kojim je zabilježio porast streamova iz istočne i južne Evrope. Održavajući ovu istaknutu prisutnost na lokalnoj sceni, Valid stalno donosi svježu i uticajnu muziku, uspostavljajući saradnje s cijenjenim umjetnicima poput Apollo Browna, Elzhi, Illa J-a, Boldy Jamesa i Skyzooa i mnogim drugima.
Sljedeće poglavlje u Validovom širenju bilo je udruživanje s još jednim detroitskim umjetnikom, legendarnim Stretch Moneyjem kako bi formirali saradnički duo Bill & Isiah. Zajedno su ostvarili hvaljeni album koji im je donio, ne samo lokalnu pažnju, već i široko priznanje, zauzevši mjesto na listama studentskih radijskih stanica širom Sjedinjenih Država i Kanade.
Kroz svoju zajedničku saradnju sa Stretch Moneyjem, nadograđujući svoju samostalnu karijeru i ponos na Detroit, Validova reputacija na hip-hop sceni se učvrstila, a njegovo vrijeme tek dolazi.
Bonus video:
