Elvir Laković Laka i njegova sestra Mirela, odlučili su da obraduju fanove za Novu godinu u vidu nove pjesme, ali i spota koji će večeras biti premijerno prikazan na MTV kanalu, ali kako je u razgovoru za “Vijesti” objasnio bosanskohercegovački muzičar, tajming je ipak bio slučajan.
“Nismo mi donijeli odluku da premijera spota bude pred novogodišnje praznike, nego nije bilo mjesta ranije na MTV-ju, a i ovaj momak Edvin Kalić koji nam je radio dva spota, nam je rekao kada je završio monitranje 'Joj Laka izvini ne sviđa mi se. Mogu li iz početka?'. Rekao sam mu da nema problema, da uzme koliko god mu treba vremena, jer nemamo nikoga ko nas u bilo čemu ograničava”, otkrio je Laka, koji je nagovijestio i o čemu se radi u novoj numeri.
“'Malokrvna je vesela pjesma u mom stilu, ali ja se trudim da je tu uvijek nešto novo i drugačije, pa će i ova biti po izražaju. A i drugačiji je spot jer smo svi na moru. Ovoga puta sam prvi put radio aranžman sa mojim prijateljem iz Makarske zove se Matko Gaće, jer nam je ovaj dosadašnji saradnik bio zauzet pa će i zbog toga biti drukčije. Neće baš biti ogromno drugačije, ali drugačiji”, otkrio je muzičar.
“Pjesma je malo smiješna, ali ako poslušate tekst vidjećete da se nisam samo zaje*avao”, dodaje on i ističe da “malokrvna” nije asocijacija za bezdušnu djevojku.
“Nije u tome smisao već osvrt na 'prevela me žednog preko vode', a ovamo 'prevela me malokrvna preko brvna'”, otkriva stihove Laka.
Njemu i Mireli prvi put su se u spotu koji je sniman u Makarskoj, pridružili i ostali članovi benda Matko Gaće (bubanj), Tomo Miladinović (gitara) i Ozren Franić (bas), a Laka otkriva kako je do toga došlo.
“Oni uvijek neće da se snimaju, valjda misle da neće ispasti dobro, ali kada su pristali i na kraju se vidjeli, dopali su se sami sebi. Ja im uvijek govorim da to mora da se ukrasi stajlingom, jer je to ipak šou-biznis”, prepričava Laka.
Na pitanje da li očekuju da će osvojiti vrh regionalne MTV top liste Domaćica, on kaže:
“Ja bih volio da stalno budem prvi u svemu, jer se to onda sluša, pa dobiješ novac za autorska prava i onda možeš da snimaš drugu pjesmu. Meni je ova već dosadila, i pjesma i spot, tako da sam već na sljedećem projektu. Sa ovim sam završio totalno, jer sam je čuo milion puta dok sam radio na njoj”.
Pored Lake i Mirele, MTV premijeru večeras u 20 sati imaće i srpski sastav S.A.R.S. koji je snimio spot za pjesmu “Tvoj čovjek”.
Pjesmama “Malokrvna” i “Tvoj čovjek” MTV završava premijere za 2016. godinu.
Bonus video:
