Neutoljiva želja za jelom može biti emocionalna, psihička ili fizička. Zato prvo pokušajte da otkrijete šta se događa vašem tijelu i umu kada ste gladni. Ponekad se želja za hranom može pripisati osjećajima poput dosade, stresa ili nervoze, zato je uvijek pametno razmisliti prije nego posegnete za omiljenom grickalicom ili slatkišem.
Ako ste zaista gladni, jedite pametno. Jedine sporo. Promislite prije nego izaberete namirnicu kojom ćete pobijediti glad i pokušajte da porcija bude izbalansirana. Neka izbor padne na namirnicu bogatu proteinima i vlaknima. Izaberite neku voćku, salatu, orašaste plodove ili šoljicu mlijeka.
Stres i nedovoljna količina sna su veliki neprijatelji sitosti i željene figure, zato je prvenstveno važno dobro i kvalitetno se naspavati, kao i pokušati pobijediti izvore tjeskobe, umora i napetosti.
Držite glad pod kontrolom: ako je neopravdana, ublažite apetit pomoću nekoliko trikova kojima možete nadmudriti sami sebe.
Pijte vodu ili nezaslađeni čaj
Često manjak tečnoszi u organizmu registrirujemo kao osjećaj gladi. Odličan način za zaustavljanje gladi je ispijanje čaše obične vode. Ona doprinosi osjećaju sitosti, a možete dodati malo i limuna u vašu vodu. Takođe, dobar izbor je i čaj. Šoljicu nezaslađenog omiljenog čaja možete uvijek imati pri ruci kako biste ugrijali vaš želudac.
Ne preskačite doručak
Najbolji način da pobijedite žudnju za hranom koja vas može pratiti tokom dana je da ne preskačete doručak. Obilan doručak može spriječiti glad koja će vas moriti navečer. Ako nijeste imali zdrav i kvalitetan jutarnji obrok ubrzo će vas sustići osjećaj nedostatka energije i umora, a glad će se češće javljati tokom cijelog dana, piše 24sata.hr.
Dan započnite obilnim uravnoteženim obrokom koji će vas nagraditi energijom za cijeli dan koji je pred vama. Nutricionisti preporučuju najmanje tri cjelovita jela u danu, koji uključuju ugljene hidrate i vlakna, proteine i masti. Ravnoteža ovih nutrijenata je važna za osjećaj sitosti. Ako nijeste navikli da jedete ujutro, natjerajte se da tu naviku promijenite. Vremenom će se vaše tijelo prilagoditi na novi raspored jela. Možete novu naviku započeti manjim obrocima koje ćete kasnije nadograđivati i uravnotežiti.
Pojedite supu i salatu
Prije glavnog jela, uvijek obrok započnite s tanjurom tople supe. Supa će vas zasititi do neke mjere pa ćete nakon nje pojesti manje glavnog jela koje može biti bogato kalorijama. Zahvaljujući velikom udjelu vode, a niskim količinama kalorija, supa je savršen izbor za smanjenje apetita i održavanje željene tjelesne težine. Ukusna supa od povrća dobro će vas zasititi i prema nekim istraživanjima smanjiti unos kalorija jela koje slijedi iza nje. Takođe, velika porcija salate, osim što je zdrava, daje nam osjećaj potrebne sitosti. Uz svaki obrok, pripremite i veliku porciju salate od raznog povrća, koju ćete minimalno začiniti s malo soli, maslinovog ulja i domaćeg sirćeta.
Vlakna i proteini pomažu
Vlakna smanjuju apetit. Povrće, voće, cjelovite žitarice, mahunarke, uz bogatstvo vlakana, sadrže i velike količine vode što doprinosi osjećaju sitosti. Što više prehrambenih vlakana obroci sadrže to će naš osjećaj sitosti biti veći, a time će se i naš apetit umanjiti. Vlakna imaju uticaj i na hormone koji smiruju apetit.
Proteini takođe obezbjeđuju da duže budemo siti i tako unesemo manje kalorija u organizam. Oni smanjuju lučenje hormone koji pospješuju glad. Namirnice bogate proteinima su riba, meso, jaja, jogurt, orasi i slične namirnice.
Spavajte dovoljno
Pobrinite se da svaku noć kvalitetno odspavate najmanje sedam ili osam sati. Kvalitetan san pomaže održavanju vitke linije. Dovoljna količina sna utiče na nivo leptina koji kontroliše apetit. Odlazak u krevet možete olakšati opuštajućim napitkom, čitanjem omiljenog štiva ili tehnikama opuštanja koje vam najviše odgovaraju, kao što su meditacija ili vježbe disanja.
Preporučuje se da veći obrok ne jedete najmanje dva sata prije spavanja. Međutim, potrudite se i da nikada ne idete gladni na psavanje. Obratite pažnju na to da glad prije spavanja može biti znak da niste jeli dovoljno tokom dana i da tijelo pokušava da kompenzuje dodatnu energiju kako bi nadoknadilo ono što je ranije propustilo.
Bonus video:
