Jedan od navećih svjetskih trgovaca bananama, slovenački biznismen porijeklom iz Petnjice Izet Rastoder, odlučio je da ulaže u Bosnu i Hercegovinu, sa idejom da stvori distributivni centar voća i povrća.
Rastoder, kog zovu i kralj banana, otvorio je pod okriljem firme MMDI Group u Sarajevu najsavremeniji distributivni centar svježeg voća i povrća u BiH, piše Seebiz.
Namjera mu je ne samo da snabdjeva tržište BiH svojim brendom banana Derby, nego i da okupi sve usitnjene proizvođače u BiH i njihove proizvode lansira na domaće tržište, a potom i u region i Evropsku uniju.
"Računam da će to svi prepoznati u BiH, da ćemo krenuti da gradimo grupno tržište, da jačamo lokalne resurse jer bez domaće proizvodnje nema napretka u državi. Zapošljavanje i domaći resursi su ključ svake države," kazao je ovaj preduzetnik sa adresom u Ljubljani na otvarenju distributivnog centra u poslovnoj zoni u Halilovićima.
Rastoder se međunarodnom trgovinom bananama bavi već oko 20 godina i za to vrijeme mu je uspjelo da se probije među tri najveća igrača u Evropi i šest najvećih na svijetu.
Najveći trgovac bananama je američka multinacionalna kompanija Dole, koja je i njegov glavni partner. Sa bananama ostvaruje glavninu prihoda, a bavi se i trgovinom citrusnog i drugog južnog voća.
Rastoder posjeduje logistički centar u Ljubljani iz kojeg snabdjeva šire područje od Milana, Beča do Budimpešte.
Rastoder se nedavno našao na stranama "Vijesti". On je donirao “dačiju logan” vlastima u Petnjici, koju je predsjednik Skupštine opštine Petnjica Adnan Muhović odlučio da zamijeni za “opel insigniju” jer, kako je rekao, "rumunski auto nije za predjsednika".
Rastoder je potom izjavio da će ubuduće dobro razmisliti prije nego odluči da ponovo donira u rodni kraj.
“Sigurno ću tri puta razmisliti kada dobijem kakvu molbu za pomoć iz tog kraja. Vjerujem da i drugi potencijalni donatori prate dešavanja u Petnjici”, kazao je Rastoder “Vijestima”.
Rastoder, koji je Petnjici poklonio i džip “dačija daster”, zbog toga je poručio predsjedniku SO Petnjica da vrati automobil ako mu ne valja, što je ovaj odbio navodeći da je rekao da zamjenom vozila nije pribavio korist za sebe, već za Opštinu.
Bonus video:
