Iranski borbeni avion F-5 srušio se u ponedjeljak na školski kompleks u gradu Tabrizu na sjeverozapadu zemlje, pri čemu su poginula dva člana posade i jedan prolaznik, saopštile su vlasti.
"Srećom, škola je zatvorena zbog pandemije Kovid-19", rekao je lokalni zvaničnik Mohammad-Bagher Honarvar za državnu televiziju.
Avion je bio u misiji obuke kada se srušio oko 9:00 (05:30 GMT) u centralnoj gradskoj četvrti Monajem, rekao je Honavar, koji vodi jedinicu za upravljanje krizama u provinciji Istočni Azerbejdžan.
Šef lokalne organizacije Crvenog polumjeseca rekao je da se avion zabio u spoljni zid, a da je jedan od mrtvih mještanin.
Na mjestu nesreće izbio je požar, a vatrogasci se bore s plamenom, kako pokazuje video zvanične novinske agencije IRNA.
Ugljenisani ostaci ratnog aviona mogli su se vidjeti među ruševinama pocrnjele fasade škole.
Avion je bio stacioniran u vazdušnoj bazi Shahid Fakouri u Tabrizu, rekao je komandant baze general Reza Youssefi, dodajući da se vraćao iz misije obuke kada je naišao na tehnički problem koji ga je spriječio da sleti.
Stara flota
Iransko vazduhoplovstvo ima oko 300 ratnih aviona, uglavnom ruskih lovaca MiG-29 i Suhoj-25 koji datiraju iz sovjetskog doba, kao i kineski F-7 i francuski Mirage F1.
Flota takođe uključuje neke američke avione F-4 i F-5 koji datiraju iz režima šaha kojeg podržava Zapad, a koji je zbačen u Islamskoj revoluciji 1979. godine.
Stručnjaci kažu da su samo neki od ovih aviona u funkciji.
U avgustu 2006. Iran je objavio da je razvio novi ratni avion pod nazivom "Azarakhsh" (Lightning) koji je opisao kao sličan F-5.
Godinu dana kasnije, predstavio je još jedan domaći mlaznjak pod nazivom "Saegheh" (Grom), rekavši da je sličan američkom F-18.
Ovo je prva nesreća u kojoj je učestvovao vojni avion od decembra 2019.
Tada se ratni avion MiG-29 srušio u blizini neaktivnog vulkana na sjeverozapadu zemlje tokom probnog leta.
Tri dana kasnije vojska je potvrdila smrt pilota.
U januaru 2019. vojni teretni avion je preletio pistu, srušio se i zapalio tokom neuspjelog slijetanja u blizini glavnog grada Teherana.
Tada je vojska saopštila da je u nesreći poginulo 15 osoba.
Bonus video:
